Бо хүнде Таңды кожууннуң Межегей суурунуң школазында 219 уруг өөренип турарын ТР-ниң Өөредилге яамызы дыңнадып турар.
Тываның өөредилге сайыдының хүлээлгезин күүседип турар Ренат Ооржак ук школаның ажыл-ижи-биле таныжып, ажылчын үнүүшкүннү кылган.
– Межегей суурнуң школазынче ажылчын үнүүшкүннү кылдым. Нарын айтырыглар бар-даа болза, школаның коллективи бурунгаар көрүштүг ажылдап турары өөрүнчүг болду.
Амгы үеде школада 219 уруг өөренип турар. Өөреникчилер-биле кады боттуг ажылдарны кылганын башкылар таныштырды: школаның девискээрин чаагайжытканы, уругларның аңгы-аңгы мөөрейлерге чедиишкиннери, спортчу тиилелгелери дээш оон-даа өске. Эки бүзүрел кезээде эки түңнелдерлиг болур.
Күш-ажыл башкызы Валерий Донгакович Бакайны онзалап демеглекседим – ол бүгү салым-чаяанын, чогаадыкчы чоруун, ажылынга ынакшылын уругларже угландырган. Ооң өөреникчилериниң ажылдары онзагай. Школа чаңгыс эвес удаа «Ус-шеверлер хоорайы» регионалдыг мөөрейге тиилээн.
Кады ажылдажылга дугайында дугуруштувус. Ооң арга-мергежилин нептередип, өскелер-биле дуржулга солчуру чугула. Ниитизи-биле алырга, школада чогаадыкчы чорук сайзыраңгай деп билдингир. Уруглар-даа, башкылар-даа школазын боттары каастап турар (херимнерни кылып, дыштаныр булуңну тургузуп, эжиктерни, соңгаларны шимеп), ол дээрге-ле инженер-техниктиг угаан-бодалды сайзырадырынга салдарлыг. Шак мындыг школаны дооскан соонда, дыка хөй өөреникчилерден уран-шевер кижилер үнеринге бүзүрээр мен.
Школага капитал септелге херек дээрзи чажыт эвес. Оран-саваның өрээл бүрүзүн көрдүм, ооң иштинде котельнаяны база. Температура өйүнде. Школаның төлевилел-дөзевилел документилери Күрүне экспертизазын эртип турар. Чоокку чылдарда ону даңзыже киирер дээш ажылдаар бис. Коллектив-биле өөредилгениң шынарын бедидер дугайында айтырыгларны чугаалаштывыс. Бо угланыышкын-биле шыңгыы ажылдаары чугула. Башкыларга методиктиг деткимчени көргүзер бис – деп, Ренат Ооржак сургакчылаашкынның түңнелдерин бодунуң блогунда бижээн.
