Улуг-Хем кожууннуң Ийи-Тал сумузунга республика чергелиг бөмбүктүг хоккей маргылдаазы болуп эрткенин чагырга чери дыңнаткан.
Спортчу хемчегни Ийи-Талдың “Эң-не тергиин халдакчызы” деп аттың эдилекчизи Таймир Шалганның чырык адынга тураскааткан. Хоккей маргылдаазынга аңгы-аңгы кожууннардан 10 команда киришкен.
Дош шөлүнге «изиг-изиг» тулчуушкуннарның түңнелинде үшкү черге Улуг-Хем кожуундан “Ийи-Тал 2”, ийиги черге Барыын-Хемчик кожуундан “Аксы-Барлык” командалары төлептиг болган. Бай-Тайга кожуундан “Бай-Тал” команданың хоккейжилери бирги черни бүзүрелдии-биле чаалап алган. Тиилекчи командаларның шаңналдары – 40000, 30000, 20000 рубль.
«Эң-не тергиин камгалакчы» – “Аксы-Барлык” команданың ойнакчызы Чаян Мооктээр, «Эң-не тергиин дозукчу» – “Ийи-Тал” команданың хоккейжизи Иргит Аюр. Тускай шаңналдарга төлептиг болганнарга дириг хой болгаш өртектиг белектерни тывыскан.
