Тываның А. С. Пушкин аттыг национал ном саңынга шылгараңгай, билдингир чогаалчы Эдуард Донгактың 1978 чылда үндүргени ооң бирги «Талыгырда чаңгы» деп номунуң 2025 чылда катап үндүрүлгезинге үлүүн киириштирип, парлалга хевиринден электроннуг хевирже шилчиткен ук номун башкы, чогаал шинчилекчизи Радион Донгак белек кылдыр сөңнээнин ном саңы дыңнаткан.
Ол ышкаш ында чогаалдарга немештир «Оран төлү» деп тоожузун Тываның улустуң чогаалчызы Николай Куулар немей киирген. Катап үндүрүлгени Ада-чурттуң Улуг дайынынга Улуг Тиилелгениң 80 чыл оюнга, Россияда Ада-чурт камгалакчызының чылынга тураскаадып үндүрген. Тоожуда тыва чоннуң фронтуга дузаламчызын болгаш дайын үезиниң аар-берге амыдыралын эки турачы Түлүш Севээн-оолдуң овур-хевирин дамчыштыр чечен-мергени-биле бижээн.
Номнуң катап база чырыкче үнеринге улуг үлүг-хуузун Ю. Ш. Кюнзегеш аттыг ном үндүрер черниң даргазы И. П. Принцева база кол редактору Н. Ш. Куулар деткип, дузазын катканнар.
2026 чылда чогаалчы Э. Донгак 85 харлаар. Ынчангаш чогаалчының юбилейлиг чылынга уткуштур ажылдар чоруттунуп эгелээн. Бо чылдың октябрь айда «Талыгырда чаңгы» деп номнуң номчулгазын чурт-шинчилел чогаалының килдизи планнап алган.
