В.Б. Кара-Сал аттыг Тээлиниң ортумак школазы үндезин септелге соонда ажыттынганын чагырга чери дыңнаткан.
Делгем, чырык школа чүс шаа оолдар болгаш уругларны хүлээп алган. Бай-Тайга кожуун чагыргазының, Төлээлекчилер хуралының удуртулгазы өөредилге чериниң коллективинге болгаш уругларга байыр чедирген.
Бай-Тайга кожууннуң чагырга чериниң даргазының мурнундан ооң амыдырал-хандырылга талазы-биле оралакчызы Аяс Хертек школаның директору Долаана Опакайга сертификатты, тудугжуларна Өөрүп четтириишкин бижиктерин тывыскан.
Ол ышкаш «Бай-Тайга кожууннуң алдарлыг башкызы» хүндүлүг аттарга школаның хоочуннары – Кара-Кыс Сенги-Доржу, Клара Хомушку, Любовь Шагаалан, Антонина Донгак, Содунам Шожунчап, Өшкү-Саар Таргын, Наталья Хомушку олар төлептиг болган.
Тывада «Өөредилгениң школа системазын чаартыры» программа үш дугаар чыл ажылдап турарын сагындыраал.
