Тиилекчи командалар Нижний Новгрородка Тываны төлээлээр

Биче бут бөмбүүнге бүгү-российжи оюннарның регионалдыг чадазында тиилээн командалар Тываны төлээлээр. Уругларның кышкы дыштанылгазының үезинде республика девискээринге дыка хөй спортчу хемчеглер болуп эрткенин демдеглезе чогуур.

Амыдыралдың кадык овур-хевирин суртаалдап, назы четпээннер ортузунга корум-урум үрээшкиннеринге удур профилактика ажылын күштелдирип, спорттуң массалыг хевирлеринче элээдилерни хаара тудары-биле хөй кижи киржикчилерлиг маргылдаалар хөйү-биле эрттирген. Оларның бирээзинге биче бут бөмбүүнге бүгү-российжи маргылдааларның регионалдыг чадазын хамаарыштырып болур.

Биче бут бөмбүүнге бүгү-российжи маргылдааларның регионалдыг чадазының беш хүн үргүлчүлээн оюннарынга 396 бичии спортчуларлыг 42 команда киришкен. Школачы командаларның киржикчилериниң күжү, белеткели аңгы-аңгы – езулуг бердинген ойнакчылар, өйлеп-өйлеп ойнап чоруурлар-даа бар.

Чараш техникалыг ойнап, түңнелдерни эккеп, боттарының командазын көргүзүп, чемпионнаары – бо удаада эң кол сорулга. Ынчангаш кым кымга-даа аштырыксаваан.

Беш хүн үргүлчүлээн маргылдааның түңнелинде, улуг оолдар аразынга бирги черни Кызылдың 3 дугаар школазы, ийиги черни – Кызыл кожууннуң Элегес-Аксы школазы, үшкү черни Ак-Довурактың 3 дугаар школазы алган.

Ол-ла бөлүкке уруглар аразынга бирги черни Барыын-Хемчик кожууннуң Аксы-Барлык школазы, ийиги черни Улуг-Хем кожууннуң Чааты школазы, үшкү черни Кызыл кожууннуң Элегес-Аксы школазының командалары чаалап алган.

Бичии бөлүктүң оолдар аразынга Кызылдың 5 дугаар гимназияның командазы чемпионнаан. Улуг-Хем кожууннуң Ийи-Талда аграрлыг школа-интернаттың командазы мөңгүн медальды чаалап алган. Ак-Довурактың 3 дугаар школазының командазы хүлер медальдарга төлептиг болган.

Бичии уруглар ортузунга Ак-Довурактың 3 дугаар школазының командазы бирги черни алган. Ийиги черде – Чадаана хоорайның 3 дугаар школазының командазы. Үшкү черни Таңды кожууннуң Бай-Хаак ортумак школазының бичии бут бөмбүкчүлери чаалап алган.

Боттарының назы-хар бөлүүнге чемпионнаан командалар – Кызылдың 3 дугаар школазы биле 5 дугаар гимназиязының оолдары, Барыын-Хемчик кожууннуң Аксы-Барлык биле Ак-Довурак хоорайның кыстары февральда Нижний Новгрородка болуп эртер түңнел оюннарда Тываны төлээлеп киржир.

«Школаларже биче бут бөмбүүн» бүгү-российжи төлевилелди эгелээн соонда, бут бөмбүүнүң секцияларынче барып турар өөреникчилер саны көвүдээн, ойнакчыларның мергежили бедээн, спортчу идик-хеви чаңгыс аай апарган – деп, маргылдааның шииткекчизи, республиканың немелде өөредилгени сайзырадыр төптүң школачы спорт килдизиниң улуг методизи Таймир Кужугет демдеглээн.