Үзе кирдирген тыва эки турачылар станцияның бир кудумчузунга кирип келгеннер. Бажыңнар соңгаларындан фашистер оларны адып эгелээн.
Дайынчылар тарай-тарай халышкылай бергеннер. Ам Ондар Сериң Тожу чурттуг Ак Седип-оол-биле иелээ апарган. Ол-бо кудумчуларда аткылажып чорааш, бир ак бажыңның хериминиң иштинче кире халчып келгеннер. Ооң чанында аңмааржыгаш хевирлиг бажың иштинде ийи кара аъттар турганын Сериң көре соп каан. Олар кара шоочалыг эжикти ажыдып чадааннар. Ак бажыңче иелээ кирипкеннер. Ооң иштинде эт-херекселдер эңме-сескелиг, бир ашак олурган.
– Даштын ийи аътты биске бер – деп, Ак Седип-оол ашакка шириин чугаалаан.
– Тачанкаларга (чымчак тергелерге) сугар немец офицерлерниң аъттары-дыр, хоржок – дээш, демги ашак тоо-даа бодаваан.
– Аъттарың бербес болзуңза шоруң – дээш, Сериң карманындан ийи хол гранатазын уштуп эккелген.
Ашак ам-на девидеп, дүрген үнүпкен. Эжикти ажыдыптарга тергиин дээн ийи кара аъттар бажын савап тургулаан. Ында ийи тачанкалар база бар болган. Ашакты шыргададып тургаш, ийи чүген ап алганнар. Аъттарны чедип үндүргеш, чавыдактапкаш, кудумчуну өрү садырт-ла дээннер. Дайзын адып, боолап турда-ла аътка уннаштыр чыткылапкаш, эрес дайынчылар Сериң биле Седип-оол чедип келгеш, станцияда дайзынның мөөңнежиишкининиң турар черин тода чугаалап бергеннер.
Номдан үзүндү.
- Уттундурбас чылдар. Незабываемые годы. – Ю.Л. Аранчын, Л.В. Гребнев, Ю.Ш. Кюнзегеш, О.К. Саган-оол, Н.А. Сердобов. – Типография управления по печати при Совете Министров Тувинской АССР. - Кызыл – 1965. – стр. 80.
ТР-ниң Национал архивиниң Ада-чурттуң Улуг дайынынга Тиилелгениң 80 чыл оюнга белеткээн чүүлү.
