Тиилелгениң чаңгызы

Салбыр командири Монгуш Сундуй бурунгалаарлап маңнап оргаш, автомадын ышкыныпкаш, кээп ушкан. Санитарка Ооржак Севил маңнап чеде берген. Балыг шарыыр херекселди уштуп эккелгеш, баштайгы дузаламчыны көргүзүп, Сундуйну чүктеп алгаш, ажыт черже союп чоруп каан. Аъттар турган черге эккээрге, медсанбатче дораан-на алгаш барган. Дедир чедип кээрге балыгланган дайынчылар база бар болган. Севил балыгланган дайынчыларны кончуг дүрген шарып турган. Ок Кандан деп дайынчының думчук дөзүнден киргеш, кулак чогуундан барып үнген болган. Ок бичии-ле ишкээрлээн болза, Кандан амы-тынындан-даа чарлыр, төрээн Чадааназынга кээп, дөргүл-төрелин-даа көрбес ийик.

Канданны шарып дооза каапкаш, Кара-оолда барган. Кара-оол иштин туттунупкаш, доңгая берген чыткан. Эрес дайынчы хилинчектелип чытса-даа, эрнин ханзырады ызыртыныпкаш, човууртавайн чыткан. Севил октуң кирген черин көргеш, үнген чери чок боорга, «хөй хан төгүлбес, оозу бооп тур, ынчалза-даа далашпааже хоржок, дораан кезип эмневес болза, хоржок тур» деп бодаан. Балыгланган дайынчыны ооргазынга каап алгаш, ооң автомадын туткаш оңгар иштин куду союп чедип келгеш, чүктеп алган дайынчызын дүжүрүп чадап каан – шаг төнген. Мындыг бичии ырбыска уруг ол хире шыырак кижини чүктеп экээр шыыраан мооң деп аът тудукчулары пат кайгаан турганнар.
Номдан үзүндү.
- Уттундурбас чылдар. Незабываемые годы. – Ю.Л. Аранчын, Л.В. Гребнев, Ю.Ш. Кюнзегеш, О.К. Саган-оол, Н.А. Сердобов. – Типография управления по печати при Совете Министров Тувинской АССР. - Кызыл – 1965. – 84-ки арын.
ТР-ниң Национал архивиниң Ада-чурттуң Улуг дайынынга Тиилелгениң 80 чыл оюнга белеткээн чүүлү.