«Тиилелгениң диктантызы-2025» делегей чергелиг төөгүнүң акциязы бо чылын апрель 25-те болуп эртерин ТР-ниң Өөредилге яамызы дыңнаткан.
Улуг Тиилелгениң 80 чыл оюнуң чылында бижимел айтырыгларга болгаш Ада-чурттуң Улуг дайынының төөгүзүнге хамаарыштыр бодунуң билиин күзелдиг кижи бүрүзү регионнуң девискээринге ажыттынар шөлчүгештерге азы албан езузунуң сайтызынга онлайн хевирге эртип болур.
Төөгүнүң акциязынга чер-чурт, назы-хар, эртем-билиинден хамаарылга чокка кижи бүрүзү киржип болур. «Тиилелгениң диктантызы» акция 2019 чылдың май 7-де 24 аңгы чуртка бир дугаар эрткенин сагындыраал. Ынчан 9-тан 90 харга чедир 150 муң кижи киришкен. Оон бээр ук акцияны чыл санында эрттирери чаңчылчаан болгаш, киржикчилери чыл санында немежип турар.
2024 чылда Ада-чурттуң Улуг дайынының маадырларының болгаш кол болуушкуннарының дугайында билиин ийи сая кижи хынаан. Эрткен чылын акция 61 чуртка база Россияның шупту регионнарынга, 28 муң аңгы-аңгы шөлчүгештерге, организастаттынган.
«Тиилелгениң диктантызы» 25 айтырыгдан тургустунган ийи аңгы хевирлиг. Харыылаар үези – 45 минута. Акцияның албан езузунуң сайтызынга бүрүткеткеш, белеткел айтырыгларга харыылап болур.
Албан езузунуң сайтызы 👉 xn--80achcepozjj4ac6j.xn--p1ai/
