Тываның информация технологияларының техникуму тускай шериг операциязының киржикчилеринге ийи автомашинаны дуза кылдыр дамчытканын ТР-ниң Өөредилге яамызы дыңнаткан. Ук машиналарны ооң мурнунда курсантылар өөредиринге ажыглап турган.
Техникумнуң удуртулгазы автомашиналарны Кызылда 55-ки гвардейжи тускай мото-адыгжы (даг) бригаданың дайынчыларынга дуза кылдыр бээр деп шиитпирлээн. Автомашиналарның байдалы эки, 2004 база 2007 чылда үндүрген. Чыл санында техниктиг көрүлдени эртип турган.
– Техникумнуң коллективи тускай шериг операциязының киржикчилеринге автомашиналарны бээр деп шиитпирлээн бис. Ооң-биле боттарывыстың бичии-даа болза, үлүг-хуувусту тиилелгеге киирип турарывыс ол болур – деп, техникумнуң директору Сай-Суу Ховалыг демдеглээн.
