Тыва үндезин культура төвү тыва улустуң аас чогаалының янзы-бүрү үлегерлерин чыыр, оларны кадагалап арттырар база чон аразынга нептередир сорулгалыг республика чергелиг «Тоолчургу ораным» деп тыва улустуң аас чогаалының үлегерлеринге хамаарышкан мөөрейни чарлаанын дыңнаткан.
Шиитпирлээр ужурлуг айтырыглары – тыва улустуң төөгү болгаш тоолчургу чугааларын чыыры, тыва улустуң амгы шагда ажыглап турар алгыш-йөрээлдерин чыыры, сайгарары, аныяк-өскенниң тыва езу-чаңчылдарынга ынакшылын күштелдирери.
Мөөрейниң бирги номинациязы – «Төөгү болгаш тоолчургу чугаалар». Бо номинацияга киржикчи кижи бодунуң чурттап турар черинге хамаарышкан тоолчургу, төөгү, коргунчуг чугааларның сөзүглелдери-биле киржир. Сөзүглелдер тус черниң агаар-бойдузу, арга-ыяжы, даглары, хемнери, хөлдери, суурнуң дугайында дээш оон-даа өске долгандыр турар объектилерге хамаарышкан болур.
Ийиги номинация – «Биче хевирлер». Ук номинацияга киржир ажылдар дээрге тыва чоннуң амгы үеде ажыглап чоруур мактал сөстери, алгыш-йөрээлдери, тывызыктары, чечен сөстери, үлегер домактары, кожамыктары болур.
Мөөрейниң болуп эртер үези: январь айның 10-нуң хүнүнден март айның 31-ге чедир эртер.
Мөөрейге киржир чагыгны болгаш сөзүглелдерни дараазында электроннуг почтаже чоргузар: ctyva@yandex.ru.
Харылзажыр дугаары: 8(39422)2-35-71.
Ук хемчегге хамаарышкан негелделерни долузу-биле киирген саавыр 👇 vk.com/doc229194089_6823232...
