Тыва үндезин культура төвү февраль 1-ден март 31-ге чедир тыва улустуң аас чогаалының янзы-бүрү үлегерлерин чыыр, оларны кадагалап арттырар база чон аразынга нептередир сорулгалыг республика чергелиг «Тоолчургу ораным» деп тыва улустуң аас чогаалының үлегерлеринге хамаарышкан ийи аңгы номинациялыг онлайн-мөөрейни чарлаанын төп дыңнаткан.
Мөөрейниң түңнелинде жюри кежигүннериниң саналы-биле «Төөгү болгаш тоолчургу чугаалар» деп номинацияга I черге Чеди-Хөл кожууннуң төлээзи Саяна Комбу (“Кодур-Өшкү” деп дагның адының тывылганының дугайында тоолчургу чугаа) төлептиг болган.
II черде Улуг-Хем кожуундан Чойгана Шалган (Черлер аттарынга хамаарышкан төөгүлүг чугаалар), III черде Эрзин кожуундан Алтынай Серембил (“Хадың-Кожуу” деп черге болган болуушкун дугайында төөгүлүг чугаа).
«Биче хевирлер» деп номинацияга Бай-Тайга кожууннуң Кызыл-Даг сумузунуң хоочун чурттакчызы Григорий Сарыглар бодунуң чогааткан тывызыктары-биле тиилекчи болган.
Шылгараан киржикчилер шаңнал бижиктерин Тыва үндезин культура төвүнүң 117 дугаар өрээлинден ап болур.
