Бо чылын Улуг-Хем кожууннуң Торгалыг суурга 176 олуттуг, спортчу шөлдүг чаа школаның тудуу эгелээр. Тываның Баштыңы Владислав Ховалыг Улуг-Хем кожуунче ажыл-агыйжы сургакчылаашкының үезинде ол ооң дугайында дыңнаткан.
Тудуг ажылын эртежик эгелээри-биле, белен төлевилелдерни ажыглаарын Тываның Баштыңы сүмелээн. 27,2 муң дөрбелчин метр хемчээлдиг школаның турар чериниң участогу тодараттынган. Ону эрги школаның чанынга тудары планнаттынган.
«Мээң бодалым-биле, ол суур ортузунда шөл дыка эптиг. Ам чаа школа тудуу чоруп турар үеде уругларга үзүктел чок өөредилге чорудуун хандырар байдалдарны тургузары чугула. Тудугну бо чылын эгелеп алгаш, ийи чыл иштинде доозуптарын планнап турар бис» – деп, Владислав Ховалыг демдеглээн.
Чаңгыс аай хевирниң төлевилели езугаар республикада элээн каш школалар туттунган. Ол төлевилел ажыглалы бюджет акша-хөреңгизин камнаарындан аңгыда, тудугну дүрген эгелээринге салдарлыг. Торгалыг суурга ооң мурнунда ол-ла кожууннуң Чодураа суурунга туттунган школаның төлевилелин ажыглаары көрдүнүп турар.
Торгалыгның амгы үеде школазы 1929 чылдан бээр чоорту туттунуп эгелээн болгаш, кол корпузун 1963 чылда ажыглалче кииргенин сагындыраал.
