Тываның девискээринде Сибирьниң биче буурай үндезин чоннары – тожу тываларын мөөңнээн «Тос-Бөрү» каттыжыышкынының төлээлери Москва хоорайда «Соңгу чүктүң эртинелери. Россияның чурукчулары болгаш мастерлери – 2023» XVIII делегей чергелиг делгелге-ярмаркага киришкен. Олар «Соңгу чүктүң хонаштары», «Эң дээре регионалдыг экспозиция», «Эң дээре национал уран чүүл чогаалы», «Национал кухня», «Сыгыт», «Вокал-инструменталдыг чогаадылга» мөөрейлеринге тиилелгелиг черлерни чаалап алган.
Федералдыг Хуралдың Федерация Чөвүлелинде Тывадан сенатор Дина Оюн чаңгыс чер-чурттугларын деткип, республикадан келген делегация-биле ужуражып, каш айтырыгларны шиитпирлежииринге дузазын катканын «Тос-Бөрү» каттыжыышкынының удуртукчузу Доржа Никитин медеглээн.
Москвада Тываның төлээ чериниң ажылдакчылары делгелге хүннеринде Тываның делегациязын бүгү аргалар-биле деткээнин албан чериниң төлээзи Урана Иванова дыңнаткан.
Каттыжыышкынның төлээлери ада-өгбелеринден салгал дамчып келген культуразын, амыдыралын болгаш уран чүүлүн таныштырып, бүдүрүп кылган барааннарын, эт-септи, эдилелдерни, идик-хепти, каасталгаларны болгаш өске-даа чүүлдерни делгээн. «Пор-Бажың» ансамбли аян тудуп, делгелгениң киржикчилериниң сонуургалын хаара туткан.
