Кезек үе дургузунда үзүктели бергеш турган кожуунарның Ай хүрежи катап эгелээн.
Тожу кожууннуң шаңналы дээш тыва хүреш маргылдаазы «Сүбедей» спорт өргээзинге болуп эрткен. Коронавирус хамчыының хайы-биле ийи чыл болбаан маргылдаага 128 мөге хүрешкен. Күжүн шенээннерниң аразында республиканың шыырак улуг болгаш аныяк мөгелери хөй болган.
Маргылдааның хүндүлүг аалчылары – ТР-ниң Дээди Хуралының Даргазы Каң-оол Даваа, депутат Сергей Куулар, ТР-ниң саң-хөө сайыды Орлан Достай олар тиилекчилерге шаңналдар тыпсыр езулалга киришкеннер.
Бо маргылдаага чаан мөге Сайын-Белек Тюлюш шүүлген, начын мөге Баасан Баткар үжүүрлешкен. Үшкү-дөрткү черлерни Караа Алаңгы биле Айдемир Саая үлешкеннер.
Тыва хүрешке кожууннар аразында көжүп чоруур маргылдааны бо чылдың октябрь айда эрттирерин Барыын-Хемчик кожуун хүлээнип алган.
