Тожу кожууннуң Ю. Ш. Кюнзегеш аттыг төп ном саңының чанынга “Тожама” аттыг чечен чогаал каттыжыышкыны ажыттынганын ТР-ниң Чогаалчылар эвилели дыңнаткан.
Чечен чогаал катыжыышкынының таваан салып, ону үндезилеп тургузары-биле кожууннуң тыва дыл, чогаал башкылары, ном саңының ажылдакчылары, Тожунуң культура эргелелиниң удуртукчузу база Адыр-Кежиг, Ий, Тоора-Хем суурлардан проза болгаш шүлүк чогаалын бижип чоруур чечен чогаалга сундулуг кижилер чыглып келгеннер.
Аңгы-аңгы суурлардан чалаткан аалчылар бот-боттары-биле таныжып алган соонда, суму бүрүзүнде шүлүк болгаш проза чогаалын шенеп бижип чоруур улуг назылыг-даа, аныяктар-даа барын төлээлеп келген кижилер бадыткап, оларны чечен чогаал бөлгүмүнге эвилелдээрин тус-тузунда саналдааннар.
Чечен чогаал катыжыышкынының ажыл-чорудулгазы, ооң сорулгалары билдингир болгай. Аңаа чаа бижип эгелеп чоруур авторларны эвилелдээр, оларга чечен чогаалдың билиглерин таныштырып, чогаалдарын эдип-чазап, арга-сүмени катпышаан, боттуг дузаны чедирер. Арга-дуржулгалыг чогаалчыларның кичээлдери чогаадыкчы мергежилге дузалыг болуру чугаажок. Каттыжыышкын Чогаалчылар эвилели-биле сырый холбаалыг ажылдаарын планнап турар.
Тываның Чогаалчылар эвилелиниң кежигүнү Эрес Кол чаа тургустунган чогаадыкчы каттыжыышкынны “Тожама” деп адап алырын саналдаан.
Каттыжыышкынның идепкейжи эгелекчилери ооң саналын чүүлдүгзүнүп, ук атка доктааганнар. А чечен чогаал каттыжыышкынының удуртукчузу кылдыр Тожу кожууннуң Ю. Ш. Кюнзегеш аттыг ном саңының чурт-шинчилел килдизиниң эргелекчизи Рада Оюнну соңгаан. Рада Балдый-ооловна ТР-ниң Чогаалчылар эвилелиниң даргазы С. М. Өндүр-биле кады ажылдаарын дугуржуп чугаалашканнар.
