ТР-ниң Дээди Хуралының Даргазы Кан-оол Даваа Россия өске чурттардан хөй дылдыы-биле онзаланып турарын демдеглээн.
– Бөгүн чуртувус Россияның чоннарының дылдарының хүнүн демдеглеп турар. Ону каш ай бурунгаар Президент Владимир Путинниң чарлыы-биле тургускан. Байырлал чурттуң хөй нация чоннарын демнештирер хүн болур.
Россия өске чурттардан хөй дылдыы-биле онзаланып турар. Чуртта 270 дыл бүрүткеттинген. Күрүне оларны камгалаарының, сайзырадырының талазы-биле ажылдарны чорудуп турза-даа, дылдарның үштүң бир кезии чидериниң айыылында турар. Тыва дылывысты суларатпазы-биле республика чергелиг эчис сорулгаларны тодараттывыс.
Дээди Хуралдың хүлээп ап турары хоойлуларны, өске-даа саавырларны тыва-орус дылдарда бижип турар. Удавас чаа албан-ёзу сайтызы ийи дылга долдуртунуп эгелээр. Ол парламентиниң тыва дылды камгалаарының талазы-биле база бир тодаргай ажылдары болуп турар.
