– Тываның Баштыңы Владислав Ховалыгның ТР-ниң Чазааның 2024 чылда кылган ажыл-чорудулгазының түңнээн отчеду-биле таныштывыс. Культура адырының хөгжүлдезинге хамаарышкан кезекти онза кичээнгейлиг номчудум.
Тываның Хөөмейжилер эвилелиниң удуртукчузу болганымда, Кызылдың уран чүүл колледжинге «Хɵɵмей» деп тускай мергежилди кииргенинге онза өөрүп, четтиргенимни илередип тур мен. Ук мергежилди дооскан кижи күрүне чергелиг дипломну алгаш, хɵɵмей башкызы, чогаадыкчы коллективтиң удуртукчузу болуп болур. Бо дээрге бистиң үндезин уран чүүлүвүстүң хөгжүлдезинге улуг үлүг-хуу-дур.
Ол ышкаш Тывага эрткен чылын делегей чергелиг фестивальдар чедиишкинниг эрткен. Ооң иштинде бистиң I «Алаш Фест» хөгжүм фестивалы, «Үстүү хүрээ» дириг хөгжүмнүң болгаш чүдүлгениң делегей чергелиг фестивалы, «Азия тɵвүнде хөөмей» делегей чергелиг фестиваль.
Культура адырының инфратургузуун чаартырынче эрге-чагырга онза кичээнгейни салып турарынга база өөрүп тур мен. 2024 чылда 17 культура албан черинге үндезин септелгени чоруткан, «Сорунза» төлевилелдиң ачызында Копту-Аксы суурга культура төвүн, Хову-Аксынга ном саңын туткан. 16 ном саңы долузу-биле чаартынган. 2024 чылда «Культура» национал төлевилелдиң ачызында чаарттынган ном саңнарының саны-биле Тывавыс Россияда мурнакчы черни ээлээн.
Ол дээрге Тываның культура адырында эки чедиишкиннер-дир деп санаар-дыр мен.
