– Тываның Баштыңы Владислав Ховалыг Дээди Хуралга 2024 чылда ажыл-чорудулгазын илеткээн. Ында кол кичээнгейни бедик шынарлыг өөредилгени чедип алырынга таарымчалыг байдалдарны тургузарынче углаан – школалар тудуглары, өөредилгениң болгаш кижизидилгениң аргаларын чаартыры, регионалдыг кезектиң төлевилелдерин боттандырары болгаш хөгжүдери.
Ук адырның удуртукчузу болганымда, ооң күрүне политиказын боттандырары-биле алдынган хемчеглерни дыңнаттым. Ак-Суг мөөң чыдымны шиңгээдиринге кадрларны белеткээри, Тастыг литийниң мөөң чыдымын болбаазырадырынга хамаарыштыр алыр болза, Россияның Чырыдыышкын яамызының деңнелинге профильдиг мергежилдерже өөренир олуттарын бадылаан.
Оон аңгыда Ак-Довурак хоорайда даг-тывыш техникуму «Профессионалитет» федералдыг төлевилелдиң киржикчизи болган. Ол ышкаш даг-тывыш адырының бүдүрүлгелери федералдыг төлевилелди боттандырарының партнёрлары болган, оларның-биле өөредилге программаларын боттандырар болгаш доозукчуларны ажылга тургузарының дугайында керээлерни чарган.
Амгы үеде «Россияда ажыл» порталда ажыл чок хамаатыларны өөредир хемчегни организастаар функцияны киирери-биле, техниктиг ажылдар чоруттунуп турар. Чижээлээрге, «Эльбрусметалл-Литийге» тускай мергежилдиглерни Тываның тудуг болгаш транспорт техникумнарынга белеткээр.
