Улуг-Хем кожууннуң чагырга чериниң даргазы Буян Балбак Шагаан-Арыг хоорайының гимназиязында тудуг ажылдарын доктаамал хынап көрүп турар.
Эрткен чылын Кара-Хаак суурнуң школазын шынарлыг септээн «Планета» кызыгаарлаттынган харыысалгалыг ниитилел Шагаан-Арыгның гимназиязында тудуг ажылдарын март 30-де эгелээн.
Өөредилге чериниң таваандан дээвииринге чедир шуптузун бүрүнү-биле чаартыр. Одалга системазы, чырык, изиг-соок суг, канализация болгаш агаар үнер система ажылы, өрт медээчилериниң дериг-херексели, видеохайгаарал салыры дээш оон-даа өске ажылдарын чорудары.
Септелге үезинде гимназияның эге класстар өөреникчилери – Шагаан-Арыгның 2 дугаар школазында, ортумак класстар – хоорайның 1 дугаар школазында, 9-11-ги класстар – 2 дугаар школаның өөредилге болгаш консультация төвүнде өөренип турар.
Кичээлдер бадылаан чурум езугаар ийи ээлчегде болуп турар.
Эге школа өөреникчилерин 2 дугаар школада изиг чем-биле хандырып, баш удур бадылаан шак чуруму езугаар оларны школа автобузу-биле чедирип турар.
Бо чылын Шагаан-Арыг хоорайының гимназиязы чуртта 2022 чылда эгелээн «Школа системазының чаартылгазы» федералдыг программаже кирген.
