Тус-чер бот-башкарылга хүнүнде Бии-Хем кожууннуң “Туран” сыын ажыл-агыйының девискээринге муниципалдыг албан-хаакчылар аразынга спортчу оюннар болуп эрткен.
ТР-ниң Дээди Хуралының депутады Аяна Монгуш байырлал таварыштыр шылгараан ажылдакчыларга болгаш хоочуннарга өөрүп четтириишкин болгаш хүндүлел бижиктерни тывыскан.
Бии-Хем кожууннуң чагырга даргазының хүлээлгезин күүседип турар Владимир Байыр-оол суму чагырга черлериниң удуртукчуларынга болгаш ажылдакчыларынга тус-чер бот-башкарылга хүнүн таварыштыр байыр чедирген.
Спартакиадага Туранның болгаш кожууннуң суму чагырга черлериниң командалары хөглүг старттарга, аргамчы тырттарынга, бот-тывынгыр уран чүүлге көрүлделерге, биче бүт бөмбүүнге маргылдашкан. Киржикчилер дүрүг сигенни безин артап турганнар.
Спортчу оюннарның түңнелдери-биле Сөөш сумузунуң командазы бирги черге төлептиг болган. Ийиги черни Өөк суму чагыргазының, үшкү черни Хүттүң командалары чаалап алган.
Туран хоорайның чагырыкчызы Аяс Донгак тиилекчилерге (I чер – 20 муң рубль, II чер – 15 муң рубль, III чер – 10 муң рубль) шаңналдарны тывыскан.
Келир чылын чаңчыл болган спортчу оюннарны Сөөш сумузунуң чагыргазы эрттирерин хүлээнип алган.
Аржаан сумузунуң чагырга чериниң удуртулгазы Бии-Хемниң суму чагыргаларының мурнундан, эрткен чылгы тиилекчи – Туран хоорайның чагырга черинге маргылдааны бедик деңнелге эрттиргени дээш четтиргенин илереткен.
