Бии-Хем кожууннуң Туранда Улуг салгалдың харылзажыр төвүнде «алдын назылыглар» амыдыралдың идепкейлиг туружу назы-хар талазы-биле кызыгаар чок дээрзин бадыткап турарын чагырга чери дыңнаткан.
Любовь Алексеева биле Раиса Торлуктуң удуртулгазы-биле Туранның мерген угаанныг болгаш идепкейлиг пенсионерлери хүннүң-не дайынчыларга эргежок чугула чажыртынып шыптынар четкилерни кылып, ачы-дуза чыылдазында киржип турар.
Чоокта чаа төпке тускай шериг операцияның киржикчизи О. Хертек аалдап кээп чораан. Маадыр тускай шериг операциязының баштайгы хүннеринден тура мурнуку одуругда тулчуп турар.
Эки турачылар шимээшкининиң идепкейжилери дайынчыга боттарының ажыл-ижин таныштырган. Аалчы энерел сеткилдиг чаңгыс чер чурттугларынга деткимчези дээш четтиргенин илереткен.
Бии-Хемниң хоочуннары республика, кожуун чергелиг аңгы-аңгы хемчеглерниң идепкейжи киржикчилери.
