Тускай операциязынга киржип чорааннар чаа грант деткимчези-биле агробизнести ажыдып болур

Президентиниң чарлааны 2025 чылда, Россияда Ада-чурт камгалакчызының чылында, тускай шериг операциязының киржикчилеринге болгаш оларның өг-бүле кежигүннеринге деткимчениң чаа хемчеглерин доктааткан.

Бо чылын эгелээн бир чаа деткимче хемчээ – курлавырда тускай шериг операциязының хоочуннарынга болгаш киржикчилеринге «Агромотиватор» грантызын бээри. Россияның Чазаа чурттуң Президентизиниң даалгаларынга даянгаш, көдээ ажыл-агый хөгжүлдезиниң күрүне программазын эде көрген. Күрүнеден субсидияны көдээ ажыл-агыйынга сайгарлыкчы ажыл-херекти эгелээр күзелдиг дайынчыларга бээр.

Федералдыг Чазактың телеграм-каналы, эът болгаш сүт продукциязы бүдүреринге бода мал азыраар дээн тускай шериг операциязының киржикчилери база хоочуннарынга чеди сая чедир, а өске угланыышкыннарга беш сая рубль чедир хемчээлдиг грант акшазы көрдүнгенин дыңнаткан. Регионалдыг комиссиялар киирген төлевилелдерни көрүп, грант алыкчыларын шилиир.

Чазак Баштыңы Михаил Мишустин РФ-тиң Көдээ ажыл-агый яамызынга агроүлетпүр комплекизиниң кадрлар талазы-биле байдалын экижидер талазы-биле Президентиниң салган сорулгаларын күүседирин, бүдүрүлге чорудуун экижидер хемчеглерни боттандырбышаан, көдээ черлерге чаа ажылчын олуттарны тургузарынга дузалаар даалганы берген.

Мал ажыл-агыйлыг Тывага тускай шериг операциязының киржикчилерин деткиир чаа хемчег онза чугула. “Ада-чурттуң камгалакчылары” күрүне фондузунуң салбырының дыңнатканы болза, республиканың чурттакчылары грант алыр арганы дыка сонуургап турар.

Кызыл кожууннуң социал координаторлар албанынче бо чылдың бирги дилээ кирген. Тускай шериг операциязының киржикчизи Артыш Монгуш бир дугаар келген кижи. Ол чанып келгеш, Кызылдың бир школазында тускай мергежилдиг болуп ажылдап, малчын коданны тудуп турар. Грант акша-хөреңгизин ажыглап, тараачын-арат ажыл-агыйын тургузар планныг. Социал координаторлар грантыже чагыг кииреринге аңаа дузалашкан. Бир эвес чөпшээрептер болза, чеди сая рубль чедир деткимчени ап болур.

#Тывачазак #ТМГМедээлер #Тыва #Тывамедээ #Тывадыл #Тывамедиагрупп #Тува