Кызылда 55-ки тускай мото-адыгжы (даг) бригадазының дайынчылары «Кара ирбиш» деп хөгжүм бөлүүн ай бурунгаар тургускан. Бо хүннерде олар Ниити-российжи улусчу фронтунуң Тывада салбыры-биле демнежип, тускай шериг операциязында киржип турар дайынчыларны деткиири-биле ачы-дуза концердинге белеткенип турар.
«Дайынчы акы-дуңмалашкы» хөй-ниити организацияның тус черде салбырының эки турачылар ротазының командири, 55-ки тускай мото-адыгжы (даг) бригадазының биче сержантызы Ачыты Нурзат эш-өөрүнүң үн тырттырар «Аrzhaan production» (продюсери Айдемир Чамгын-оол (Айдар) студиязында “Бистиң бригада командири” деп үшкү ырын бижидип турарын дыңнаткан. Ону тускай дайынчы даалгазын күүседип турар командиринге турскааткан.
– Бо чайын июль айда «Кара ирбиш» бөлүүн тургузар бодал тыптып келген. Одаг чанынга тыва шериглерниң шайлап турган үези. Украинага Лисичанск хоорайны хостап алырывыска, Төп шериг округунуң командылакчызы тыва дайынчыларны «кара ирбиштер-дир силер» деп үнелээн. Ооң соонда бо ат Украинада тыва шериг оолдар аразында дыргын тарай берген. Бөлүүвүсче менден өске тускай шериг операциязынга киржип турган дайынчы эжим база кирип турар. Ол Бай-Тайга чурттуг салыг-чаяанныг хөгжүмчү, ыраажы.
Тываже чанып келгеш, бөлүүвүстүң «Тываң дээш түрлүг чор» деп баштайгы ырызын бижиттирдивис. Бо ырыны Украинада тускай шериг операциязында киржип турар эрес-дидим чаңгыс чер-чурттугларывыска база төрээн Тывавыстың төлептиг, коргуш чок оолдары – тайбың-чаагай келир үези дээш хары черге бажын салган маадырларывыска тураскааттывыс. Ырының сөзүн аныяк чогаалчы Тимур Кадын-Нава бижээн, аялгазын Айдар чогааткан, үн каастакчызы Даваа Дандар. “Төрээн Тывам эзирлери” деп ырыны база маадырлыы-биле чок болган оолдарывыска тураскааткан.
Мээң күзелим – көжүп чоруур тускай хөгжүм херекселдери-биле дериттинген куяк автомашиналыг болуру. Ол ынчан шериг албан-хүлээлгезин күүседип турар оолдарывыска база Донбасстың чонунга концерттерни көргүзер аргалыг апаар бис. Ол ышкаш бөлүүвүстү улгаттырып, вокал-инструменталдыг ансамбльди тургузары мурнуку сорулгаларывыстың бирээзи – деп, бөлүктүң солизи Ачыты Нурзат тайылбырлаан.
Улусчу фронтунуң регионалдыг салбырының күүсекчи комитединиң удуртукчузу Саима Далчин тыва дайынчыларны QR-код таварыштыр деткип болурун дыңнаткан.
– Ниити-российжи улусчу фронтунуң “Бүгү чүүлдү тиилелгеге!” деп ачы-дуза акциязының чорудуу-биле тускай шериг операциязында киржип турар дайынчыларны деткээн ачы-дуза концердин эрттирер. «Кара ирбиш» бөлүү ук хемчегниң кол организакчылары. Ачы-дуза концердин республиканың билдингир артистери болгаш бөлүктери деткиир. Билеттерде QR-код таварыштыр акшаны шилчидип болур. Чыгдынган акша-хөреңги-биле тускай шериг операциязында киржип чоруур дайынчы оолдарга немей дериг-херексел садары көрдүнген.
Чарлалдыг баннерлерни хоорайның аңгы-аңгы девискээрлеринге азар, ынчангаш концертче келбейн-даа, QR-код таварыштыр тыва дайынчыларны деткип болур. Украинада тускай шериг операциязында киржип турар Тывадан дайынчыларга дуза кылдыр акша чыылдазын “Улусчу фронт. Бүгү чүүлдү тиилелгеге!” төлевилел-биле чыгдынган акша-хөреңги Тыва Республиканың агар санынче кирер – деп, күүсекчи комитединиң удуртукчузу чугаалаан.
Кызылда 55-ки тускай мото-адыгжы (даг) бригадазының баазазында тургустунган «Кара ирбиш» бөлүү ноябрь 17-ниң хүнүнде Улусчу чогаадылга бажыңынга 17:00 шакта ачы-дуза концердин эрттирер. Өртээ – 500 рубль.
