Тускай шериг операциязының 170 киржикчизи болгаш оларның өг-бүле кежигүннери «социал керээлерни» чарган

Бо чылын тускай шериг операциязының 170 киржикчизи болгаш оларның өг-бүле кежигүннери социал керээге үндезилээн күрүне деткимчезин алган.

Тывада тускай шериг операциязының киржикчилеринге болгаш оларның өг-бүле кежигүннеринге эң хереглелдиг деткимче хемчеглериниң бирээзи «социал керээ».

ТР-ниң Чонну ажылга хаара тудар албанының дыңнатканы-биле алырга, бо чылын ук категориядан 170 хамааты социал керээге үндезилээн күрүне деткимчезин алган, ооң иштинде 90 кижи тускай шериг операциязының киржикчизи болза, 80 кижи – оларның өг-бүле кежигүннери.

Тыва Республикада 2022 чылдан эгелеп, тускай операцияларның хоочуннары, киржикчилери болгаш оларның өг-бүле кежигүннери социал керээге үндезилээн күрүне деткимчезин мурнады алыр эргелиг. Тываның Баштыңы [id360104045|Владислав Ховалыг] күрүне деткимчезинге хууда ажыл-агыйын эгелээн улус-биле бо чылдың Наадымында чугаалашкан.

Россия Чазааның деткимчези-биле ук программазының күүселдезин шыңгыы хыналдага ап, чаңгыс чер чурттугларының амыдырал-чуртталгазының деңнелин элээн экижиткенин ол демдеглээн. Күрүне деткимчезиниң алыкчылары арга-дуржулгазын болгаш салым-чаяанын ажыглап тургаш, боттары ажылдап алырын кызып чоруур тура-соруктуг болгаш чүткүлдүг кижилер-дир дээрзин Владислав Ховалыг демдеглээн. Оларга чүгле дуза болгаш эге капитал херек турган.

Чыл эгезинден бээр тускай шериг операциязының 44 хоочуну боттарының ажыл-агыйын ажыдар дээш күрүне деткимчезин чарган. Бо хүнге чедир олар республиканың аңгы-аңгы муниципалдыг тургузугларында үш ыяш дилдирер бүдүрүлгени, алды техниктиг хандырылга станциязын, үш идик септээр, дөрт чазанылга мастерскаяларын, ийи демир кылыглар бүдүрер база септээр черни, дөрт кафени, бир машина чуур черни, ажыл-агыйга ачы-дуза көргүзер бүдүрүлгени, алды тудуг бүдүрүлгезин, ийи эът болгаш өске-даа продукция бүдүрер бүдүрүлгени, ийи чурук студиязын ажыткан.

Оон аңгыда, шериг албан-хүлээлгелиглер айыыл чок чорук хандырар адырда, арыгланып-аштаныр болгаш чаш таарар, ыяштан аңгы-аңгы чүүлдер кылыр, мал чеми бүдүрер, одалга системаларын хайындырып эптээр дээш, оон-даа өске угланыышкыннарга «социал керээлерни» чарган.

46 кижи көдээ ажыл-агый хөгжүлдезинге хууда ажыл-агыйын ажыдарын шилип алган. Оларның 45-зи мал-маган тударын, а бирээзи ногаа аймаан тарып эгелээн.

Социал керээлер чарган тускай шериг операциязының киржикчилериниң 80 өг-бүле кежигүннериниң 49-у хууда сайгарлыкчылар кылдыр бүрүткеткен. Оларның аразындан сес кижи эът белеткээн чиг продукцияны бүдүрүп турар болза, чеди кижи чараштаныр болгаш чурук тырттырар салоннарны ажыткан, үш-үш кижи кондитер болгаш уруглар карактаар черлерни ажыткан, ийи кижи бухгалтер ачы-дузазын, үш кижи уругларга немелде өөредилге черин ажыткан. Кафе болгаш нугуу салону ажыдарынга, аштап-арыглаашкын болгаш полиграфия ачы-дузазын чедиреринге, дыштанылга болгаш хөглээшкиннер организастаарынга социал керээ акша-хөреңгизин ажыглаан. Күрүне деткимчезиниң алыкчылары идик-хеп болгаш кештен кылыгларны бүдүрүп, дыштанылга барааннарын хөлезиге болгаш чээлиге берип, оран-саваларны комплекстиг ажыглап турар.

Тускай шериг операциязының киржикчилериниң чоок 31 кижизи хууда дузалал ажыл-агыйын тудуп эгелээн, оларның 28-зи мал-маганче, а үжү ногаа аймаан тарыырынче кирген.

Дайын шөлүнден чанып келген тускай шериг операциязының хоочуннарын болгаш оларның өг-бүлелерин ажылче хаара тударынга деткимче көргүзери – регионалдыг эрге-чагыргаларының амгы үеде мурнады шиитпирлээр айтырыы болуп турар. Бо ажылда ТР-ниң Чонну ажылга хаара тудар албанының ажылдакчылары, социал координаторлар, «Ада-чурт камгалакчылары» фонд салбырындан тускай мергежилдиглер идепкейлиг киржип турар.

Республикада тускай шериг операциязының хоочуннарын ажылга хаара тударынче угланган өске-даа хемчеглерни ажыл берикчилери-биле кады боттандырып турар. Ылаңгыя хостуг ажылчын олуттар тускай ярмаркаларын, Тываның даг-руда компаниязы биле «Восток» кызыгаарлаан харыысалгалыг ниитилелдиң баазазынга ужуражылгаларны болгаш өске-даа хемчеглерни организастаан.