Тускай шериг операциязының хоочуннарын тускай даараан идик-хеп-биле хандырып турар

«Ада-чурт камгалакчылары» күрүне фондуу тускай шериг операциязының хоочуннарынга техниктиг реабилитация дузазы кылдыр тускай даараан эптиг идик-хепти халас берип турар. 2025 чылдың чайынындан бээр фонду 2800 ажыг ындыг хепти үлээн.

Тывада 20 хоочун чыл эгезинден бээр фондунуң салбырының дилээ-биле тускай хеп комплектизин алган. Россияның Президентизи Владимир Путинниң деткимчезиниң ачызында фонд хоочуннарны тускай идик-хеп-биле хандырып шыдаан.

Тускай мергежилдиглер идик-хепти шилип тургаш, хоочун бүрүзүнүң кадыкшылын, мага-бодунуң шыдалын, бот-тускайлаң хереглелдерин кичээнгейге алган. Комплектиде үш аңгы хептер кирген: чайгы, кышкы болгаш сезоннар аразының. Футболкалардан эгелээш, бөрттеринге чедир 12 аңгы хеп ында кирген.

«Балыгланган будумну кезип каапкан. Хепте даараан тыртар өөктер, чыпшырар-адырар чүүлдер, базыткыыштар кеттинеринге эптиг-дир. Спортка белеткенир, ажылдаар, хемчеглер баарда кедер хептерим бар. Оларны аңгы-аңгы байдалдарда кедер кылдыр кылганы эки чорду» – деп, тускай шериг операциязының хоочуну, адаптивтиг хептиң бир дугаар эдилекчилериниң бирээзи Буян Адышаа чугаалаан.

Комплект хепти алыр дизе, фондунуң салбыры азы удуртукчу социал координатору-биле харылзажыр, олар билдириишкинни долдурарынга дузалажыр. Фондунуң Кызылда салбырының адрези: Кызыл партизаннар кудумчузу, бажың 30.

«Кижи бүрүзүнүң онзагайын барымдаалаан тускай даараан эптиг хеп, аар кемдээшкинниг камгалакчыларга бодунга бүзүрелин эгидип алырынга болгаш тайбың амыдыралга дүрген чаңчыгарынга дузалаар. Оларга спортчу болгаш чогаадыкчы ажыл-чорудулгага киржип, профессионал чедиишкиннерни чедип алырынга, бүгү талазы-биле идепкейлиг амыдыралды чурттаарынга амгы үениң технологиялары, ооң иштинде адаптивтиг мода, чаа аргаларны ажыдып турар. Камгалакчы бүрүзү деткимчени ап, бүзүрелдиг бурунгаар шимчээр кылдыр бүгү-ле байдалдарны тургузары – бистиң сорулгавыс ол» – деп, РФ-тиң камгалал сайыдының оралакчызы – статс-секретары, «Ада-чурт камгалакчылары» күрүне фондузунуң даргазы Анна Цивилева демдеглээн.