Октябрь 15-те Аныяктар өргээзинге Тывада «Россияда ажыл» кадрлар төвү-биле «Ада-чурт камгалакчылары» фондунуң регионалдыг салбыры тускай шериг операциязының киржикчилеринге болгаш оларның өг-бүлелеринге хостуг ажылчын олуттар ярмарказын организастап эрттирер.
Социал камгалал, күш-ажыл болгаш чонну ажылга хаара тудар регионалдыг органнарның боттандырып турары деткимче хемчээниң бирээзинге тускай шериг операциязының киржикчилерин болгаш оларның өг-бүле кежигүннерин күш-ажылга хаара тудары болур. Республиканың Баштыңы Владислав Ховалыг тускай шериг операциязындан халашкан киржикчилерның, ооң санында кадыкшыл байдалы кызыгаарлыг дайынчыларның амыдыралга дүрген чаңчыгар байдалдарын тургузар ол угланыышкынны күштелдирерин дааскан.
«Лунсин» КХН, «Тываның даг-руда компаниязы» КХН, «Эльбрусметалл-литий» КХН, «Туваавтотранс» КХН, «Автоколонна 17» КХН база УПП ВОС дээш, өске-даа улуг компаниялар тускай шериг операциязының киржикчилеринге болгаш оларның өг-бүле кежигүннеринге хостуг ажылчын олуттарны ярмаркада сүмелээр.
«Ада-чурт камгалакчылары» фондунуң ажыл-чорудулгазының мурнады боттандырар угланыышкынарының бирээзинге тускай шериг операциязының хоочунарын болгаш оларның өг-бүле кежигүннерин ажылга тургузары хамааржыр.
«Фондунуң бүгү-ле салбырларында ышкаш, ол угланыышкын-биле ажылга тургузар болгаш өөредир тускай сорулгалыг ажылдаар секторну бо чылдың январьда тургускан бис. Фондунуң ажылдап эгелээн үезинден бээр, ажылга тургустунарынче дуза дилээн 300 ажыг билдириишкин бистиң салбырывысче кирген. Оларның 82 хуузу эки шиитпирлеттинген. Ам октябрьның 15-те, тускай шериг операциязының киржикчилеринге ийи дугаар тускай ярмарка эртер. Бо удаада эмчилер шинчилгези эртер, анализтер дужаар, психологтуң консультациязын алыр диспансеризацияны программаже киирген бис» – деп, филиалдың удуртукчузу Мерген Кызыл-оол дыңнаткан.
«Россияда ажыл» кадрлар төвүнүң директору Айлана Бюрбю бо чыл эгезинден бээр, Чонну ажылга хаара тудар төптерже 151 тускай шериг операциязының киржикчизи ажылга тургузар дилегни кииргенин дыңнаткан.
«Россияда ажыл» порталда ажылга тургустунарынга деткимче хемчеглери көрдүнген болгаш, киржикчи бүрүзүнге аңгы хемчеглер планы тургустунган. Бөгүнде 11 тускай шериг операциязының киржикчизи «автомобиль кранының машинизи», «автобус чолаачызы», «С категорияның чолаачызы», «эки турачы өртчүлер дружиналарын белеткээри» мергежилдерге эде белеткел курстарын эрткен. Сес кижи өөредилгезин уламчылавышаан. Ийи кижи өөренип дооскаш, ажылда тургустунган, бир кижи Тываның күрүне университединиң хүндүскү салбырынче дужаап кирген. 27 кижи социал керээ чаргаш, бодунуң ажыл-херээн ажыткан.
«Тускай шериг операциязының киржикчилери Чонну ажылга хаара тудар төптер таварыштыр чаа мергежилдерге өөренип, ажыл берикчилеринден чөптүг саналдарны алыр дээрзинге идегеп турар бис. Ынчангаш тускай шериг операциязының киржикчилериниң өг-бүле кежигүннерин база ярмаркаже чалап тур бис. Ажыл тып алырынга оларга база дузаны көргүзер. Бо чылдың эгезинден бээр тускай шериг операциязының киржикчилериниң 57 өг-бүле кежигүннери «Россияда ажыл» кадрлар төвүнче чагыгны киирген, оларның 31-инге ажылче тургустунарынга дузалашкан бис» – деп, Айлана Бюрбю дыңнаткан.
ТР-ниң күш-ажыл рыногунда электри эптекчизи, кран болгаш экскаватор башкарар, ыяш болбаазырадыр адырларда, медицина ажылдакчылары, күш-ажыл башкылары, программистер болгаш өске-даа тускай мергежилдиглер онза негеттинип турарын Тываның «Россияда ажыл» кадрлар төвү дыңнаткан.
Тускай шериг операциязының киржикчилерин ажылга хаара тударынга «Тываның маадырлары» регионалдыг төлевилел база идигни берип турар. Төлевилелдиң саң-хөөчүлери Тываның күрүне университединиң баазазында РАНХиГС-тиң программалары-биле өөренип турарлар. Программаның тиилекчилериниң бирээзи Иван Монгуш эрткен неделяда Тываның Лицензия албанында удуртукчунуң оралакчызы кылдыр ажылдап эгелээн.
