ТР-ниң Чазак Даргазының оралакчызының хүлээлгезин күүседип турар Айдыс Сынаа тускай шериг операциязында албан хүлээлгезин эрттирип турар дайынчыларның өг-бүле кежигүннери-биле “Ада-чурт камгалакчылары” күрүне фондузунга ужурашкан. Төп шериг округунуң Кызыл хоорайда бактааттынган 55-ки гвардейжи тускай мото-адыгжы (даг) бригаданың 35 хире дайынчызының социал четкилерге видео-дилээнге даянгаш, оларның чоок улузунуң Тываның Баштыңының адынче киирген дыңнадыг-билдириишкини – чугааның үндезини болган.
Дайынчы хөделиишкиннер девискээринде албан хүлээлгезин эрттирип турган 55-ки мото-адыгжы бригаданың чамдык шериглерин 51-ги армияның шаап халдап кирер 114 дугаарлыг кезээнче шилчидер дээн дужаалга дайынчылар таарзынмаан. Олар боттарының “төрээн” бригадазынга артып кааш, өөренген эш-өөрү-биле эгин-кожа даалгаларны күүседиринге беленин илереткен. Ындыг болзажок, шериг чуруму-биле алырга, дужаалды сайгарбас, а ону чүгле күүседир. Шериг даңгыраан хүлээнип алган, азы керээ чарган кижиниң хажыдып болбас дүрүмү ол.
– Төп шериг округунуң 41-ги гвардейжи ниити армияның 55-ки даг-адыгжы бригаданың шериглери керээ езугаар ажылдап турар дайынчылар болганда, үстүкү командылал черинден-даа, кезектиң командирлериниң-даа дужаалын күүседири албан – деп, 55-ги гвардейжи мото-адыгжы бригаданың командириниң хүлээлгезин күүседип турар Роман Стрекалов тайылбырны эгелээн. Дужаал Төп шериг округунуң командылал черинден келген болганда, ону чүгле ол өскертип болурун сагындырган.
Бо удаада ужуражылгада келген дайынчыларның чоок улузу оларның оолдарын, өөнүң ээлерин эң берге байдалдарда тудуп, куду көрүп, чемгербейн турарын дүвүрээзин-биле дыңнадып, доп-дораан дедир 55 кезээнче шилчидерин дилээн.
Айдыс Сынаа дайынчыларның өг-бүлелерин дыңнаан соонда, регионалдыг чазактың ажылын допчулай таныштырган.
“Амгы үеде бүгү чуртта кандыг байдал чоруп турарын дыка эки билир силер. Ада-чурттуң бот-догуннаашкынын камгалаан бо дайынчы хөделиишкинде бистиң дыка хөй чаңгыс чер чурттугларывыс киржип, эрес-дидим тулчуп, күрүнениң болгаш албан чериниң бедик шаңналдарынга төлептиг болуп чорууру биске улуг чоргаарал. Тываның Баштыңы Владислав Ховалыг тускай шериг операциязының талазы-биле айтырыгларны боду доктаамал хынап турар болгаш, ында сөөлгү болуушкуннарны база хыналдада алган. Чоокта чаа Тывадан чаңгыс чер чурттуг оолдарывыстың видео-дыңнадыы соцчеткилерге көстүп келирге-ле, ол бодунуң ТШО талазы-биле харыылап турар оралакчыларын болгаш чогуур черлерниң удуртукчуларын чыып, сайгарылганы кылган. Ооң түңнели-биле негелде бижикти Төп шериг округунуң командылал черинче чоруткан. Ол ышкаш Күрүне Думазының депутады Айдың Сарыглар база албан езунуң бижиин киирген” – деп, оралакчы дарга тайылбырлаан.
Дайынчыларның төрээн улузу оларның айтырыын дарый шиитпирлээрин дилээн. Баштыңның тускай шериг операциязынга хамаарышкан айтырыгларны чурумчудар талазы-биле оралакчызы А. Сынаа чогуур шиитпирни хүлээп алырын дыңнаткан.
Ол ышкаш Тываның Баштыңы база бо чоокку хонуктарда шериг кезээнче бир төлээни сургакчыладып чорударын шиитпирлээн. Тускай төлээ чоруур мурнунда дайынчыларның өг-бүлелери-биле катап база ужуражырын дугурушкан.
