Хову-Аксының Алдар аллеязынга тускай шериг операциязының киржикчизи, 55-ки гвардейжи мотоадыгжы даг бригаданың дайынчызы Чойган Ондарның чырык адын мөңгежидип, тураскаал самбыраны ажытканын чагырга чери дыңнаткан.
Хемчегге кожууннуң удуртулгазы, “Ада-чурттуң камгалакчылары” күрүне фондузунуң кожуунда салбырының төлээзи, чоок кижилери болгаш чаңгыс чер чурттуглары киришкен. Маадыр 2024 чылда чүрээниң кыйгызы-биле, керээ езугаар, тускай шериг операциязының девискээринче эки тура-биле чорупкан турган.
Тураскаал самбыраны Чойган Ондарның ачазы Алексей Идай-оолович, хеймер дуңмазы Артыш, төрелдери болгаш чоок кижилери ажыткан. Тускай шериг операциязының үезинде амы-тынындан чарылган дайынчыга сактыышкынынның минутазын чарлаан. Митингиниң киржикчилери самбыраа баарынга чечектерни салган.
Маадыр Улуг-Хем кожууннуң Чодураа суурга төрүттүнген. Чаатының школазынче бирги классче өөренип кирген, тоску классты Сайлыг школазынга дооскан. Хову-Аксының 9 дугаар профессионал училищезинге телемастер мергежилди чедип алган. Күш ажылчы намдарын 17 харлыында эгелээн. Ол Хову-Аксының чылыг-энергетика төвүнге, чуртталга-коммунал ажыл-агыйынга, назылап-кыраан болгаш харык-шинээ кызыгаарлыг хамаатыларга дазылга бажыңынга ажылдап турган. Ч.А. Ондар беш оолдуң ачазы, бичии уйнуунуң кырган-ачазы.
2025 чылдың апрель айда Чойган Ондар Донецк Улус Республиканың Котляровка чурттакчылыг черниң девискээринге дайзынның туружун шавар сорулганы күүседип турган. «Кушкаштар» халдаашкынының үезинде, бөлүүнден бир дайынчы аар балыглаткан. Ол доп-дораан аңаа баштайгы эмчи дузазын көргүзүп, хан төгүүшкүнүн соксадып шыдаан. Балыгланган дайынчыны чаштынар черже сөөртүп чедиргеш, ол шавар халдаашкынны уламчылаан.
2025 чылдың август 16-да Чойган Ондар дайынчы даалгаларын күүседип тура маадырлыы-биле амы-тынындан чарылган. Ол эрес-дидим, ат-алдар болгаш езулуг маадырлыг чоруктуң үлегер-чижээ болуп, кезээ мөңгеде артар.
Маадырны РФ-тиң Камгалал яамызының «Тускай шериг операциязының киржикчизи» медалы, угаан-сарыылдыг эгелекчи саналы болгаш албан-хүлээлгеге ылгалы дээш Хүндүлел бижик-биле шаңнаан.
