Тускай штаб мал кыштаглаашкынының төнчүзүнге чедир ажылдаар

Тываның Көдээ ажыл-агый яамызында тускай штаб мал кыштаглаашкынының төнчүзүнге чедир ажылдаар. Республиканың малчыннары кажаа-хораазын чылыглап, сиген-ширбиилин чедирип, кыштагларынче көшкен.

Бо чылын республиканың муниципалдыг тургузуглары кыштаглаашкынче 280 муң тонна сиген-ширбиилди, чеди муң тонна мал чиир тарааны курлавырлап, мал чеми белеткээр планын ажыр күүсеткен.

Барыын-Хемчик, Чөөн-Хемчик, Таңды, Сүт-Хөл база Кызыл кожууннарның мал чеми-биле хандырылгазы эки. Мал чеминиң муниципалдыг болгаш республика курлавырында 3 200 тоннаны белеткээн. Араттар малынга дусту четчир кылдыр чедирип алган.

ТР-ниң Көдээ ажыл-агый болгаш аъш-чем яамызы ажыл-агыйның бүгү хевирлеринде 200 муң баш бода, бир сая ажыг шээр, 100 муң хире баш чылгы, бир муң ажыг баш иви малдар, 284 баш теве база 11 муң баш хаван бо чылдың кыштаглаашкынынче киргенин дыңнаткан. Малдың күш деңгели ажырбас.

– Моол талазындан улуг хар эрте дүшкенинден, харның кылыны 20 сантиметр чеде берген Мөңгүн-Тайга кожуунда байдалды онза хыналдада алган бис. Тываның Көдээ ажыл-агый яамызы база кожууннуң удуртулгазы малчын коданнарже оруктарның байдалын хүн бүрүде хынаары чугула. Херек апарза, ону дарый аштаарын организастаар. Кожуун бүрүзү серемчилелди кошпатпас ужурлуг. Тываның агаар бойдузунуң өскерлиичелин билир болганывыста, судалды холдан салбас – деп, Тываның Баштыңы Владислав Ховалыг айыткан.

Тываның Баштыңының даалгазы-биле мал кыштаглаашкыны төнгүжеге ажылдаар тускай штабты регионнуң Көдээ ажыл-агый яамызында тургусканын дыңнаткан. Баш удур көрдүнмээн байдалдар тургустунган таварылгада, ол черже дүрген үнер ийи бөлүктү аңгылаан. Яамының тускай мергежилдиглери чедери берге малчын турлагларже үнүүшкүннерни доктаамал кылыр. Кожуун чагырга черлери мал ажыл-агыйларында сиген-ширбиилдиң кайы хире барын неделя санында сайгарар.

Яамыда дүн-хүн чокка ажылдаар изиг шугум телефонун ажылдаткан. Чурттакчы чон 9-75-50 дугаарлыг телефонче долгапкаш, мал кыштаглаашкынынга хамаражыр онза байдалдарны дыңнадып болур.