2025 чылдың март 19-20 хүннеринде, Кызылда Аныяктар ордузунга «Тыва: Агроинвест-2025» инвестиция шуулганы болуп эртер. Аңаа Россияның регионнарындан, Моолдан, Кыдаттан база Беларусь Республикадан төлээлер киржир.
Рыноктуң кол төлээлери: бүдүрүкчүлер, инвесторлар, технология компаниялары, садыгжылар – киржикчилер санында. Иркутск облазында Кыдат Улус Республиканың чиңгине консулу Ли Хай база Енисей Сибири хөгжүлде корпорациязы-биле кады ажылдажылгалыг инвесторлар «Тыва: Агроинвест-2025» шуулганга киржир күзелин дыңнаткан.
ТР-ниң Чазак Даргазының оралакчызының хүлээлгезин күүседип турар Уран-оол Ондар «Тыва: Агроинвест-2025» шуулган делегей чергелиг ажыл-агыйжы харылзааларны тургузарынга болгаш ханыладырынга, ол ышкаш бот-боттарынга ажыктыг эштежилге харылзааларын тургузарынга кол шөл апаар ужурлуг дээрзин онзалап демдеглээн. Ол бирги хемчегниң чедиишкинниг эртеринге бүзүреп, киржикчилерниң географиязын ам-даа калбартырынга, регионнуң делегей ареназынга туружун быжыглаарынга дузалаарын демдеглээн.
Шуулганның планында регионнуң көдээ ажыл-агыйын болгаш агроүлетпүр комплекизин хөгжүдеринге хамаарышкан эчис сорулгалыг айтырыгларлыг улуг хуралдар, таныштыралгалар болгаш сайгарылгалар кирген. Киржикчилерни “Сергеихинский текстиль” акционерлиг ниитилел, бойдус байлаан болбаазырадыр «Вавиол» фабриказы, «Белдир» көдээ ажыл-агый бүдүрүлге кооперативиниң эът болбаазырадыр цеги дээн ышкаш, республиканың алыс кедилиг болбаазырадылга бүдүрүлгелерин сонуургадыр чымыштыг ажыл-агыйжы программа манап турар.
Инвестиция шуулганынга суггаттыг чер ажылын хөгжүдериниң угланыышкыннарын, мал чиир культураларны тарып өстүрерин, мал-маганны одарладыр аргаларны, ээн одар-белчиирниң үрелиишкиннеринге удур хемчеглерни, эът болгаш балык үлетпүрүнүң хөгжүлдезин, бойдус байлааның болбаазырадылгазын база көдээ болгаш аңнаашкын туризмин сайзырадыр арга-шинекти сайгарар. Ылаңгыя «Тыва хой эъди» ылгавыр демдектиң таныштырылгазынче кичээнгейни угландырар.
Шуулганның делгелгезинге 20 компания киржирин дыңнаткан. Олар боттарының продукциязын болгаш төлевилелдерин таныштырар. Ынчангаш фермерлер болгаш чер ажылдыг кижилер инвесторларның боттары-биле ол-ла черинге харылзааны тургузуп, чаа инициативаларынга акшаландырыышкынны тывар аргалыг. Уран-оол Ондарның демдеглээни дег, тус черниң чер ажылдыглары болгаш малчыннары аңаа киржирин дыңнадырынга ам-даа үези бар.
Тываның инвестиция порталында бүрүткел эгелээн 👉 ituva.ru/
Россияның регионнарындан болгаш даштыкы чурттардан адырның эксперттери болгаш лидерлери агротехнологияларда боттарының арга-дуржулгазын база сөөлгү чедиишкиннерин үлежир.
Илеткелчилерниң илеткелдерин болгаш таныштырылгаларын моол болгаш кыдат дылдарже очулдурар. Киржикчилер чарыгдалдарның шынарын бедидеринге болгаш эвээжедиринге ажыктыг билиглерни болгаш практиктиг сүмелерни алыр. Инвестиция дугуржулгаларынга аттар салыры-биле хемчег доостур.
