Апрель 9-10 хүннеринде Кызылга болуп эртер «Тыва: Агроинвест-2026» инвестиция шуулганы Енисей Сибириниң агроүлетпүр комплекизин хөгжүдер адырда кол болуушкун болур.
Бо чылын шуулган «Сибирьниң агроүлетпүр комплекизи – экологтуг арыг тулган продукция» деп тема-биле эртип, адырның өзүлдезиниң эчис сорулгалыг угланыышкыннарын сайгарар шөл апаар.
Хемчегге эрге-чагырганың федералдыг болгаш регионалдыг органнарының, хөгжүлде институттарының, ажыл-агый ниитилежилгелериниң төлээлери, ол ышкаш Кыдат Улус Республикадан болгаш Моолдан албан езузунуң делегациялары чыглыр. Тыва Республиканың инвестиция курлавыры база экспортче угланган бүдүрүлгени хөгжүдери, көдээ ажыл-агыйга чурагайлыг технологияларын киирери, делегей чергелиг кады ажылдажылганы калбартыры – кичээнгейниң төвүнде.
Ажыл-агыйжы программада пленарлыг болгаш инвестиция сессиялары, мал ажыл-агыйында, көдээ ажыл-агый продукциязының болбаазырадылгазында, мелиорацияда, мал чеминиң бүдүрүлгезинде, агротуризм хөгжүлдезинде алыс кедилиг төлевилелдерни таныштырары кирип турар. Улуг бизнес биле биче болгаш ортумак сайгарлыкчы чоруктуң аразында кады ажылдажылгаже, ол ышкаш b2b (бир компания өске компанияның барааннарын азы ачы-дузазын садар) чугааларны чорударынче онза кичээнгейни угландырар. Шуулганның төнчүзүнде чаңчыл езугаар кады ажылдажылга дугуржулгаларынга аттарны салыр.
Эрткен чылдың арга-дуржулгазындан алырга, шөлдерге хергелел улуг дээрзин бадыткаан. 2025 чылда шуулганга 741 бизнес төлээлери, ооң иштинде даштыкы партнерлар киришкен. 30 дугуржулгага атты салган, оларның элээн кажы: Тывада хой ажыл-агыйында уксаажыдылга ажылы эде чаартынып, көдээ ажыл-агый техниканың хандырылгазы калбарып, амгы үениң мелиорация аргалары боттанып турар.
«Тыва: Агроинвест-2026» республикаже инвестицияларны хаара тударын быжыглаар болгаш регионнуң аграрлыг экономиказын хөгжүдеринге чаа аргаларны бээр.
