Арысканның шеверлери суурнуң чагырга бажыңынга чыглып, тыва бөрттү болгаш ойнаар-кысты даараарының чажыттарынга өөренип алганын чагырга чери дыңнаткан.
Ийи-Талдан тыва бөрттерни даарап чоруур шевер ава Имма Тулушту болгаш тыва ойнаар-кыс даараар шевер кыс Алдын-кыс Доржукайны арысканчылар чалап, мастер-классты эрттиргени ол.
Бөрт даараарынга 1-1,5 метр хире торгу, додар пөзү, дүктүг пөс херек. Быжып даарап алган тыва бөргүнүң тейинге дошканы даараар, ол ыяап кызыл өңнүг болур деп Имма Тулуш тайылбырлаан.
Арысканчылар улуг сонуургал-биле быжып, даарап өөренип, шеверлекчилерниң арга-сүмелерин шиңгээдип алганнар.
Суурнуң хөй-ниити чөвүлелиниң удуртукчузу Чечеймаа Кыргыс биле херээженнер чөвүлелиниң удуртукчузу Айлаңмаа Байыр мындыг хевирлиг ужуражылгаларны чаңгыс эвес удаа эрттирип турарлар.
