Тыва чоннуң аас чогаалының кадагалакчылары

Тыва үндезин культура төвүнге «Тыва чоннуң аас чогаалының кадагалакчылары» деп дептерниң таныштырылгазы болуп эрткенин төп дыңнаткан. Чырыкче үнүп келген чаа номнуң үндүрүлгезин «Тыва» бөлүүнүң 35-ки юбилейлиг чылынга тураскааткан.

Ук номда тыва улустуң аас чогаалынга үндезилеттинип тургустунган «Тыва» бөлүүнүң төөгүзү болгаш чогаадыкчы ажыл-чорудулгазы парлаттынган. Оон аңгыда бөлүктүң киржикчилериниң кыска допчу-намдарларын, чуруктарын болгаш бөлүктүң баштайгы оюн-көргүзүүнүң сценарийин киирген.

Тыва чоннуң аас чогаалынга үндезилээн “Тыва” бөлүүнүң 35 харлаан оюн демдеглевишаан, тыва хөөмей-сыгыттың хөгжүлдезинге улуг үлүг-хуузун кииргеннерни ТР-ниң Культура ямызының “Культура болгаш уран чүүлдүң хүндүлүг хоочуну” деп шылгаралдың демдээ-биле Кызылдың А. Б. Чыргал-оол аттыг уран чүүл колледжиниң хоочун башкызы В.В. Нагорныйны, Тываның В.Көк-оол аттыг хөгжүм-шии театырының артизи А.Х. Салчакты, делегей чергелиг “Хөөмей” академиязының эртем ажылдакчызы З.К. Кыргысты база, ол ышкаш, ТР-ниң Культура яамызының “Уран чүүлдүң тергиини” деп хөрек демдээ-биле Тываның улустуң хөөмейжизи, «Тыва» бөлүүнүң солизи Ш. О. Чооду-Ооржакты шаңнаан.

Тыва үндезин культура төвү «Тыва» бөлүүнүң тургустунарынга болгаш ооң сайзыралынга үлүг-хуузун киирген кижи бүрүзүнге өөрүп четтиргенивисти илередип, күдүк базып мөгейген. Төөгүлүг «Тыва» бөлүү кайгамчык чараш аас чогаалывысты делегейниң кайы-даа булуңнарынга тура дүшпейн кезээде чаңгыландыр ойнап чоруурун йөрээген.