Улуг-Хем кожууннуң Шагаан-Арыгның 2 дугаар ортумак школазының тыва дыл болгаш чогаал башкызы чораан Мерген Федорович Бавуунуң чырык адынга тураскааткан республика чергелиг II эртем-практиктиг конференция болуп эрткенин Национал школа хөгжүдер институт дыңнаткан.
Эртем-практиктиг конференцияны М.Ф. Бавуунуң өг-бүлези, төрелдери база Шагаан-Арыгның 2 дугаар школазының коллективи демнежип эрттирген.
Конференция ийи аңгы угланыышкынныг ажылдаан: өөреникчилерниң ажылдары база башкыларның ажылдары. Ниитизи-биле тос аңгы секцияга солун болгаш ажыктыг ажылдарны үнелеп үндүрген.
Национал школа хөгжүдер институттуң улуг методистери Альбина Монгуш база Регина Монгуш өөреникчилерниң болгаш башкыларның ажылдарын дыңнап көргеш, түңнээр ажылга киришкеннер.
