Тываның гуманитарлыг болгаш социал-экономиктиг тускай шинчилелдер институдунга тыва дылче очулдурган "Лео биле Тиг" деп мультфильмниң баштайгы серияларының көргүзүү болуп эрткен.
ТР-ниң Дээди Хуралының Өөредилге, культура болгаш информация политиказының талазы-биле хораа даргазы Белекмаа Мунге "Номад" шинчилелдер төвүнүң командазынга байырын чедирген.
– Тыва дылды кадагалап болгаш сайзырадыр айтырыгга мультфильмнерни тыва дылче очулдурары кол хемчеглерниң бирээзи. Бичии чаштарга эң-не солун, таарымчалыг хевир деп көргүзүгге келген школачылар демдеглеп турдулар.
Төлевилелдиң боттаныышкыны Тываның Баштыңының хамааты ниитилелди хөгжүдер грантызының деткимчезиниң ачызында болдунганын институттуң ажылдакчылары Артыш Монгуш биле Начын Монгуш демдегледилер – деп, ол дыңнаткан.
Амгы үеде мультфильмниң бирги сезонунуң 26 сериязының сезин очулдуруп, белеткээн. "Номадтың" кежигүннери, чалаткан үн режиссерлары болгаш артистер мультфильмниң сөзүглелиниң очулдуруп, үннелдирип турар. Улаштыр кылдынган ажылдарны төп бо арынга салыр, ынчангаш бо бөлүкче кирип алыңар https://vk.com/wall-82432199_326
2023 чылда биле "Номад" автономнуг коммерциялыг эвес гуманитарлыг шинчилелдер төвү Тываның Баштыңының хамааты ниитилелдиң хөгжүлдезинче грантызынга «Тыва дыл – тыва чоннуң өзээ» деп төлевилели-биле киришкеш, тиилекчи болганын сагындыраал.
Тыва бичии уруглар бичиизинден тура төрээн дылын өөренип, арыг, хостуг чугааланып алырынга тыва дылда «Лео биле Тиг» болгаш өске-даа өөредиглиг, солун болуушкуннарлыг мультфильмнер улуг идигни бээр деп аныяк эртем ажылдакчылары санап турар.
