Каа-Хем кожууннуң Кундустуг суурда «Челээш» уруглар садынга «Төрээн Тывам» деп программа-биле ажылдап турар башкыларга "Авамның хуулгаазын аптаразы" деп методиктиг деткимче талазы-биле семинарны кожууннуң өөредилге эргелелиниң уруглар садтары-биле ажылдап турар Зоя Монгуш удуртуп эрттирип турарын Национал школа хөгжүдер институт дыңнаткан.
Хемчегге школа назыны четпээн уругларга тыва дылды өөредириниң чамдык аргаларынга хамаарыштыр Каа-Хем кожууннуң уруглар садтарының удуртукчулары, тыва дыл башкылары, кижизидикчи башкылар база Национал школа хөгжүдер институттуң директору Елена Куулар, улуг методистер Альбина Монгуш, Снежана Ондар үзел-бодалын үлежип, киришкеннер.
Кижизидикчи башкы Алла Адыяның «Авамның хуулгаазын аптаразы» деп мастер-клазы келген башкыларның сонуургалын чаалап алган. Семинарның киржикчилери таныштырган материалдарның чогаадыкчы чоруун болгаш практиктиг ужур-утказын онзалап демдеглээннер.
Семинарның киржикчилери мындыг хевирлиг хемчеглер тыва дылды кадагалап арттырарынга болгаш сайзырадырынга, ону келир салгалдарга дамчыдарынга идигни берип турар деп түңнээннер.
