Тываның А. С. Пушкин аттыг национал ном саңының чурт-шинчилел чогаалы болгаш национал библиография килдизи Тываның политехниктиг техникумунуң сургуулдарынга «Тыва эки турачы танкистер» деп тускай ном делгелгезин тайылбырлап көргүскенин ном саңы дыңнаткан.
1941 чылда Совет Кызыл Армия Тываның Араттыг Революстуң шериинге «Т-28» маркалыг чаа танкыны, танкетаны болгаш куяк автомашиналарны бергениниң соонда, ол чылын полктуң дайынчы даңзызынга танк салбырын тургускан.
Тываның чазаа Совет чазакче танк башкарарынга өөредир тускай эртемниг башкыны чорудуп бээр дилег билдириишкинни киирген.
Шериг кадрларын дайынчы техникага өөредири-биле тускай мергежилдиг Ульяновскиниң бронетанк училищезиниң взвод командири Савелий Григорьевич Рудикти сургакчы-башкы кылдыр чоруткан. Ол тускай шилиттинген оолдарны танк башкарарынга өөреткеш, «танкист» деп шынзылганы тывыскан.
1943 чылдың май 20-де, демир аът мунар 10 танкисти кончуг кичээнгейлиг хынааш, фронтуже үдээн.
Донгак Уйнук-оол Долдаакпан оглу Горький хоорайга тыва танкистерге каттыжып алгаш, улаштыр он бирги тыва танкист болуп, дайынче чорупкан.
Биче лейтенант Түлүш Нурсат Самбу оглу Ада-чурттуң Улуг дайынынче тыва эки турачы танкистерни баштап алгаш аъттаныпканын база Совет Эвилелиниң Маадыры Хомушку Чүргүй-оол Намгай оглунуң маадырлыг чоруунуң дугайында дыңнап, билип алганнар.
Сургуулдар Ада-Чурттуң Улуг дайынынга маадырлыы-биле киришкен тыва эки турачы 11 танкист дугайында сонуургал-биле дыңнап, хөй-хөй чаа чүүлдерни билип алганынга өөрүп, четтиргенин илереткеннер.
