Тыва Республиканың өөредилге яамызының удуртулгазы-биле Башкы болгаш дагдыныкчы чылынга тураскааткан республиканың башкылар чыыжының баштайгы хемчеглери эгелей бергенин Национал школа хөгжүдер институт дыңнаткан.
Кызыл хоорайның ССРЭ-ниң улустуң башкызы А.А. Алдын-оол аттыг 2 дугаар школазында арга-дуржулга солчуушкунунуң ажык эжиктер хүнү эгелээн. Тываның онзагай төөгүлүг хоочун школазы аалчыларын – кожууннардан келген эге класс болгаш тыва дыл, чогаал башкыларын кел чоруур Шагаа байырлалынга уткуштур белеткеп алганы «Тыва өгнүң дериг-херексели» деп делгелгези-биле уткуп алган.
2 дугаар школаның эге болгаш ортумак класстарынга ниитизи-биле 14 ажык кичээлдер болуп эрткен. Аңаа республиканың аңгы-аңгы школаларындан чүс чээрби башкылар кээп олуржуп, школаның класс-музейинге экскурсиялааннар. Оон аңгыда эге класс башкылары «21» деп төлевилелдиң киржикчилери-биле ужуражып, эге чаданың өөредилгезинге сан болгаш хүрээлел эртемнерин тыва дылга өөредип турарының айтырыгларын чугаалашканнар.
Школаның башкылары болгаш өөреникчилери Тываның башкылар чыыжынга Татарстандан келген хүндүлүг аалчыларын уткуурунга белен.
