Мөңгүн-Тайга кожууннуң өөредилге эргелели «Уруглар садтарында хүреш» төлевилелин боттандырып, 4-7 харлыг оолдар аразынга кожуун чергелиг хүреш маргылдаазын эрттиргенин дыңнаткан.
«Эзирлерниң уязы» төлевилелиниң ачызында туттунган спорт залынга бичии мөгелер ачыр-дачыр тудушканнар. Күрүне тугун көдүрер езулалга уруглар садтарының доозукчулары – Чаш Арзылаң мөге Лопсан-Чимит Ондар, Чаш Чаан мөге Хеймер Чыдым-оол болгаш Чаш Хартыга мөге Ай-Мерген Салчак олар киришкен.
4-5 харлыг оолдар аразынга бирги черни «Сылдысчыгаш» уруглар садының мөгези Олзей-Очур Шомбул, 6-7 харлыг оолдар аразынга бирги черни ол-ла уруглар садының кижизиттирикчизи Тэнцзин Насык-оол чаалап алган.
«Уруглар садтарында хүреш» төлевилел шыырак, салым-чаяанныг бичии мөгелерни тып илередип, тыва хүреш оюнун сайзырадырынга идигни берип турар.
