Сүт-Хөл кожууннуң Александр Ондар аттыг төп культура одаанга Шагаа база Россияда чарлаттынган Өг-бүле чылынга тураскааткан "Тыва хевим – чоргааралым" деп мөөрей болуп эрткенин чагырга чери дыңнаткан.
Мөөрейниң эрттирикчилери, кожууннуң төп болгаш уругларның үлегер-майыктың ном саңнары тыва хептин сагылгаларын, быжып даараарын, каасталгаларын аныяк салгалга дамчыдар деп кол сорулганы салганнар.
Хемчегниң кол негелделери езугаар киржикчилер национал хептерин үе аайы-биле көргүзүп, уран-талантызын бараалгадып, айтырыгларга харыылап, боттарын таныштырганнар.
"Тыва хевим – чоргааралым" мөөрейге Айдыс биле Элдеп Ондарларның өг-бүлези бүзүрелдии-биле бирги черни чаалап алган. Ийиги черге Василий биле Ольга Кууларларның, үшкү черге Кежик биле Марианна Конзай-оолдарның өг-бүлелери төлептиг болганнар.
