Тыва келир кыштың белеткелинче 340 хире сая рубльди аңгылаан

Республиканың муниципалдыг тургузугларында сентябрьның 15-20 хүннеринде эгелээн одалга сезону эки чоруп турарын Тываның Одалга болгаш энергетика яамызы дыңнаткан.

Яамының тускай мергежилдиглери чылыг энергиязының дөстеринде хөмүрнүң чарыгдалынга болгаш артыынга хүн бүрүнүң мониторингизин чорудуп, хыналдада алган.

Республиканың чурттакчыларын 452 котельная: дөрт улуг котельная, бир ЧЭТ, чуртталга-коммунал ажыл-агыйының тос котельнаязы база социал адыр объектилериниң 438 котельнаязы чылыг-биле хандырып турар.

220/35 кВ күчүлүг 40 дузалал станция база 6-10/0,4 кВ күчүлүг 1190 дузалал станция тос муң хире километрде шөйлү берген чырык удазыннары энергия хандырылгазын берген. Ниитизи-биле 7 МВт күчүлүг 13 дизельдиг чырык станциялары ажылдап турар.

Тыва бо чылдың күскү-кышкы белеткелинче 340 сая рубльди үндүрген. Республиканың каттышкан бюджежинден 120 ажыг сая рубльди, артканын бүдүрүлгелер хандырган. Эргижиреп элээн дериг-херекселдерни септеп, солаан.

Чылыг хандырылгазының объектилерин септээринче 180 сая хире рубльди аңгылаанын Чылыг болгаш энергтика яамызы дыңнаткан. 14 котелдуг агрегаттарның кол болгаш немелде дериг-херекселдеринге агар септелгени, бежинге капитал септелгени кылган. 1,93 километр чылыг, 2,62 км суг хоорзаларын база 1,1 километр канализация четкилерин солаан.

Чырык четкилериниң агаар болгаш кабель удазыннарының капитал септелгезинче, ыяш чагыларны демир-бетон чагылар-биле солуурунче, 10/0,4 кВ күчүлүг 47 трансформатор дузалал станцияларының капитал септелгезинче база 1000 кВА чедир күчүлүг кылдыр 28 трансформаторну эде кылырынче 66 хире сая рубльди чарыгдаан.

Республиканың чуртталга фондузун кышка белеткээринче 25 ажыг сая рубль чарыттынган. Хөй аалдыг 571 бажыңда планнаттынган хемчеглер күүсеттинген, белениниң паспорттарын алган.

Дизельдиг дериг-херекселдерден чырык хандырылгазын ап турар чедери берге кожууннарда эргижирээн чырык дериг-херекселдерин эрткен чылдан бээр солуп эгелээн. Бо чылын 32 сая рубльге тос чаа дизель-генераторларны саткан. Эрзин кожууннуң Качык база Тожу кожууннуң Сыстыг-Хем суурларда агрегаттарны салган. 500 кВт күчүлүг 5 дериг-херекселди Мөңгүн-Тайганың курлавырында, ийини Тере-Хөл биле Тожуда салган. Дизельдиг дузалал станциялар чырык курлавырын хандырып турар.

Ажылга үрелиишкиннерни болдурбас база штаттан даштаар байдалга белен болуру-биле, энергетика база ЧКА бүдүрүлгелеринде материалдар болгаш дериг-херекселдерниң аварийлиг курлавырын 21,5 сая рубльге садып белеткээн.

Республика бюджединиң "соңгу чүк сөөртүлгези" деп адаар кезекте 61 сая рубльди чедери берге 30 суурларда социал адыр объектилерниң хөмүр хандырылгазынче аңгылаан. Кышка белеткел кампаниязында 15,6 муң тонна хөмүрнү адерстерде дүжүрген.

Экспертер республика бөгүнде кышка 98 хуу белен деп үнелээн. Элээн каш объектиде септелге ажылдары бо хүннерде доостур, биче котельнаяларның ажылдакчылары Ростеххайгааралдың сөөлгү сагындырыгларын эдип турар.