Тыва Республика 2026 чылдың апрель 25-тен май 25-ке чедир болуп эртер улуг хемчээлдиг экологтуг акция – «Ногаан час» бүгү-российжи субботникке база каттыжар.
В.И. Вернадский аттыг күрүнениң эвес экология фондузунуң бойдус камгалалынга улуг үлүг-хуузун киирер сорулгалыг 2014 чылдан эгелеп чуртта боттандырган бо эгелээшкини чылдың-на бүгү Россиядан хөй санныг эки турачыларны мөөңнээри чаңчыл апарган.
Төлевилелдиң сорулгазы – аныяктарның экологтуг кижизидилгезин, экологтуг культураны хевирлээри, долгандыр хүрээлелди кижиниң багай салдарындан камгалаарынга хамаатыларның, организацияларның болгаш күрүне органнарының күжениишкиннерин каттыштырары.
«Ногаан час» - чүгле арыглаашкын эвес, а бойдуска сагыш човаашкынның езулуг байырлалы-дыр! Эрткен чылдар дургузунда ол хемчег миллион-миллион российжилерни каттыштырып, долгандыр хүрээлелге харыысалгалыг хамаарылганың болгаш экология культуразын хөгжүдериниң демдээ апарган» – деп, регионда экологтуг бо кампанияны организастап турар Арга-арыг яамызы демдеглээн.
Тыва Республика бүгү-российжи субботниктиң 2018 чылдан бээр киржикчизи. Девискээрлерни аштап-арыглаары, чечектер болгаш ыяштар олурары, макулатура болгаш катап ажыглап болур чиг эт чыылдазы, бокту аңгылап чыыры, ол ышкаш уруглар ойнаар шөлдерни катап тургузары дээш, оон-даа өске эгелээшкиннерни субботник үезинде боттандырып турар.
Тус чер чагыргалары болгаш чурттакчы чон уруглар ойнаар шөлдерни болгаш бажың чанының девискээрлерин чаагайжыдып, херимнерни будуп, чугайлап, ыяштар болгаш чечектерни тарып, бичежек тураскаалдарны тургузуп, катап ажыглаан чиг этти чыып турар.
Бо чылын Тывадан субботникке 1300 ажыг кижи: эрге-чагырга төлээлери, албан черлер ажылдакчылары, эки турачылар, сагыш човаачал чурттакчы чон каттыжар. Олар парктарны, сесерликтерни, Улуг-Хемниң болгаш ооң адырларының эриктерин аштап арыглаар. Муниципалдыг тургузуглар девискээрлеринде суг объектилерин, тураскаалдарны, парктарны база арыглаар.
Арга-арыг яамызы боттарының херимнерин болгаш чоок-кавы девискээрлерин чаагайжыдарынга киржип, экологтуг акцияларга болгаш субботниктерге эки тура-биле киржир кылдыр чурттакчы чонну кыйгырган.
