Тыва поэзияның дээжизи

Артык Ховалыг,
Тыва Республиканың алдарлыг ажылдакчызы, Россия Федерациязының культуразының алдарлыг ажылдакчызы, ат-сураглыг чогаалчы, журналист

Домактажып ээп келир чуртум

Тыва черим чараш дагларын
Карактарым тырттырып алды.
Харамдыгып, магадап көрүп,
“Тывызыксыын” деп эргелеттим.

Он чыл чедир көрбээним даглар
Онзагай мени уткуп алды.
Оруктуң ол-бо талаларын
Оочурлаан дег улай чыскаалган.

Чырык Херел олардан чайнап,
Шынаа, ховаа чаттыла берген.
Шыдал-шинээм көдүрүлдүр
Сырынын мендилеп чайдылар.

Тос Таңды куржап алган Тывам,
Домактажып ээп келир чуртум.

Кырган-авам хеми

Хемчиктиң кылаң арыг суу
Кедергей чараш ырлыг-дыр.
Сүзүп кылаштааш тааладым.
Сүзүүм-сүлдем көдүрүлдү.

Иелерим төрээн хеми,
Ижип чораан аржаан суу бо.
Доктаай дүшкеш, сүдүм өргүп,
Домактажып келгеним бо.

Буттан өрү Чер тыныжы
Бүткүр ботту тарбыдады.
Буянымны четчелештир,
Бүрүлбаазын күштү берди.

Хылдыг-Үзүк баары ойдан
Кырган-авам чаптап көрдү.

Чонум сорук киирди

Чогаалдарым шагда манаан
Чоорган болгаш дөмек болган,
Чонумга, черимге бодум
Чолукшуп барып четтим-даа.

Тос чыл дургу көрүшпээним
Тос Таңдылар уткуп алды.
Тос хондур чуртум эргилдир
Долдур сүүзүнүн амзадым.

Шүлүктерге мени алгаан
Чолдуг чонум амыранчыын!
Сүзүктүг болганындан боор,
Сорук киирикчи күштүглер.

Аалымга барганым дарый
Алдан бир сонет бижидим.