Тыва Россия хүнүн ада-чуртчу хемчеглер болгаш акциялар-биле демдеглээр

Тывага Россия хүнү – күрүне байырлалын республиканың хоорайларынга болгаш суурларынга ада-чуртчу болгаш кижизидикчи хемчеглер-биле чаңчыл езугаар демдеглээр. Муниципалитеттерниң административтиг төптерге база Кызылда Арат шөлүнге албан езузунуң кол хемчеглери болур.

Июнь 12-де Россия Федерациязының болгаш Тыва Республиканың күрүне туктарын көдүрер езулалды эрттирип, чурттуң 14 хар чеде берген чалыы хамаатыларынга паспорттарны байырлыг байдалга тыпсыр. Улусчу уран ус-шеверлерниң делгелге-ярмарказы, чонга консультация шөлдери, Россия хүнүнге тураскааткан байырлал концерти, «Россия дээрге бис-тир бис!» деп хөйнүң самы болур.

Кызыл хоорайның болгаш кожууннарны хамааты байдалдың актылар бижидилгезиниң органнарынга өг-бүле тутканының бүрүткели, үлегерлиг өг-бүлелерни шаңнап-мактаары, ада-чуртчу кижизидилге лекциялары болуп эртер. Социал албан черлеринге, өг-бүле болгаш уругларга деткимче төптеринге байырлал программаларын, чуруктар делгелгелерин, төөгү шактарын эрттирер.

Культура болгаш өөредилге албан черлеринге ада-чуртчу кижизидилге кичээлдери, темалыг делгелгелер, викториналар болгаш акциялар, ол ышкаш культура-өөредилге хемчеглер, квесттер, интерактивтиг оюннар болуп эртер.

Национал парктың төп шөлүнге мөөрейлер болгаш викториналар планнаттынган, ооң-биле чергелештир Кызылдың чогаадыкчы коллективтериниң байырлыг концерти болур.

Россия хүнүнге тураскаадып, хүндүскү лагерьлер чаңгыс аайлаан хемчеглер хүннерин эрттирер. Уруглар «Россияның үш өңү» бүгү-российжи акцияга, асфальтыга чурук мөөрейлеринге, база «Российжи эксперттер» ажык чугааларга болгаш викториналарга киржир.

«Россияның үш өңү» бүгү-российжи акция-биле Россияның күрүне тугун Дөгээ даанга көдүрер чаңчыл болу берген хемчегни организастаар. В.М. Халилов аттыг Тываның күрүне филармониязының 57-ги концерт сезонун хагган байырлыг оюн-көргүзүг «Азия төвү» скульптура комплекизиниң девискээринге болур.