Бо хүннерде бүгү Россияда база Тывада Ада-чурттуң Улуг дайынының хоочуннарын, ол ышкаш оларга деңнештирген дайынчы хөделиишкиннер киржикчилерин, тылдың ишчилерин, хоочуннарның өөнүң иштилерин, дайын чылдарының ажы-төлүн хүндүткеп байырлап турар.
Кызылда үш хоочун: Георгий Васильевич Абросимовка, Кирилл Иванович Марковка, Анатолий Михайлович Крутиковка байырлыг чыскаалды эрттирген. Оларның амыдырал-чуртталгазы эрес-дидим чоруктуң, тура-соруктуң болгаш төрээн чуртунга ынакшылдың үлегер-чижээ.
Чалыы армейжилер, Кызылдың 3 дугаар школазының болгаш Бии-Хем кожууннуң Сесерлиг суурнуң казактар класстарының өөреникчилери, Тываның экономика болгаш эрге-хоойлу колледжизиниң сургуулдары, Тываның кадет корпузунуң кижизиттирикчилери, Кызылда Кутузов орденниг 55-ки гвардейжи мото-адыгжы бригаданың төлээлери шериг оркестри-биле кады, Кызыл хоорайның шериг комендатуразы, Истелге комитеди, Орус культура төвү, ТР-ниң Националдар херектериниң талазы-биле агентилели, Күш-ажыл болгаш социал политика яамызы, «Чаңгыс демниг Россия» партиязы дээш, 400 ажыг кижи хоочуннарга аалдап четкен.
Националдар херектериниң талазы-биле федералдыг агентилелдиң база Россияның чоннарының ассамблеязының чуртта эрттирип турар улуг төлевилели – «Хоочуннуң бажыңының баарынга чыскаал» деп ада-чуртчу акция-биле фронтучуларга тускай оюн-көргүзүглерни болгаш концерттерни көргүзер.
Акция чүгле хүндүткелди эвес, а салгалдар аразында быжыг харылзааны тудуп, тайбыңны чаалап алганының өртек-үнезин сагындырып турар.
Чылдың-на бүгү чуртта муң-муң кижилерни каттыштырып, Тиилелге хүнүнге белеткелдиң чугула кезээ апарган «Хоочуннуң бажыңының баарынга байырлыг чыскаал» акция, совет чоннуң маадырлыг чоруу мөңге, оларның салгалының мөгейии төнчү чок дээрзин база катап бадыткаан. Акцияның сорулгазы – тайбың дээрни салгалдарынга сөңнээн болгаш дайынның шылгалдазын эрткен кижилерге мөгейигни болгаш хүндүткелди илередири.
Чоокта чаа Тываның тоолчургу фронтучузу Георгий Абросимов мугур чүс хар оюн демдеглээнин сагындыраал.
