Бөгүн Тыва “Тиилелгениң диктантызы” делегей акциязынга каттышкан. Ада-чуртчу хемчег республиканың муң ажыг чурттакчызын хаара туткан.
Чүс үжен ажыг шөлчүгешке Тываның Чазааның төлээлери, тускай шериг операциязының киржикчилери, парламентарийлер, школачылар, студентилер, эки турачылар дээш, өскелер-даа идепкейлиг киришкен.
Диктант бижиириниң база бир кол шөлчүгежи – Тываның Алдан-Маадыр аттыг Национал музейинге киржикчилер хөйү-биле чыглып келген. Диктантының бижилгезинге киржири-биле келген кижилерниң аразында Россияның Маадыры, «Тываның маадырлары» кадрлар программаның киржикчизи Буян Куулар база бар.
“Тиилелгениң диктантызы” – “Чаңгыс демниг Россия” партияның улуг хемчээлдиг чырыдыышкын акциязы. Сес дугаар чыл эртип турар акцияны бо чылын Ада-Чурттуң Улуг дайынының эгелээниниң 85 чылынга база Совет Эвилелиниң маршалы Георгий Жуковтуң төрүттүнгенинден бээр 130 чыл оюнга тураскааткан. Ооң-биле чергелештир бүгү чуртта «Маадырга чагаа» деп чугула акция эртип турар. Бистиң школачыларывыс мурнуку одуругда дайынчыларга чагааларны бижээн" – деп, ТР-ниң Дээди Хуралының даргазы Кан-оол Даваа чугаалаан.
Тиилелгениң эки турачылары Ада-чурттуң Улуг дайынының база амгы тускай шериг операциязының төөгүзүн шын билип, дайынчыларның маадырлыг чоруун утпазы чугула дээрзин оназалап демдеглээн.
Диктантыда 25 айтырыг бар. Бо чылын тускай шериг операциязының дугайында айтырыгларны киирген.
