Тываның Баштыңы Владислав Ховалыг Москвага ажыл албан аайы-биле чорааш, тускай шериг операциязының киржикчилерин деткиир талазы-биле Күрүне чөвүлелиниң хуралынга киришкен.
Күрүне чөвүлелиниң кежигүннери тускай шериг операциязының киржикчилеринге болгаш оларның өг-бүлелеринге ачы-дуза чедирер талазы-биле аңгы-аңгы регионнарның арга-дуржулгазын сайгарып, деткимче хемчеглерин калбартыр талазы-биле санал-оналдарны киирген.
Тывада тускай шериг операциязының киржикчилеринге болгаш хоочуннарынга, ол ышкаш оларның өг-бүлелеринге саң-хөө болгаш саң-хөөге хамаарышпас элээн хемчеглерни көргүзүп турар.
Россияның Президент Администрациязының удуртукчузунуң бирги оралакчызы Сергей Кириенко база Күрүне Чөвүлелинде ол угланыышкынны хайгаарап турар Президентиниң дузалакчызы Алексей Дюмин Күрүне чөвүлелиниң хуралын удуртуп эрттиргеннер.
«Тускай операция киржикчилерин болгаш оларның өг-бүлелерин деткиир айтырыг Президент Владимир Владимирович Путинниң хууда хайгааралында. Улуг ажылдар кылдынган бол, оон-даа хөйнү кылыр херек деп, хуралда демдеглээн. Дайынчы хөделиишкиннер хоочуннарынга деткимче көргүзер ажылда тургустунуп келген айтырыгларны болгаш чамдык регионнарның арга-дуржулгазынга даянып, ону шиитпирлээрин сайгарып көрдүвүс» – деп, ужуражылга соонда Владислав Ховалыг дыңнаткан.
Тывада тускай шериг операциязының киржикчилерин болгаш оларның өг-бүлелерин деткиири-биле амгы үеде бар күрүнениң деткимче хемчеглеринге немей дузаламчының чаа хевирлерин ажыглап эгелээн. Хоойлужудулга деңнелинде бо ажыл «Тускай шериг операциязының киржикчилеринге немелде социал магадылалдар болгаш оларның өг-бүле кежигүннеринге социал деткимче хемчеглериниң дугайында» деп регионалдыг хоойлу-биле чурумчуттунган.
Тываның эрге-чагыргазы тускай шериг операциязының киржикчилеринге болгаш оларның өг-бүлелеринге деткимчениң хемчеглерин, ооң санында саң-хөөге хамаарышпас дузаламчыны доктаамал калбартып турар. Чижээ, 2025 чылдан эгелеп «Социал хөмүр-даш» төлевилелиниң киржикчилерин калбартып, хөй ажы-төлдүг өг-бүлелерден аңгыда, тускай шериг операциязынга чок болган дайынчыларның өг-бүлелерин, тускай операцияның инвалид хоочуннарын, ис чок читкен шериглерниң өг-бүлелерин кадыг одаар чүүл-биле хандырары көрдүнген. Тускай шериг операциязының киржикчилери болгаш оларның өг-бүлелери тренажер залдарынче болгаш өске-даа спортчу объектилерже халас кирер эргени алган.
Тускай шериг операциязындан халашкан шериг албынныгларга «Чедер» санаторлуг-курорт болгаш кадыкшылга комплекизинге дыштанылганы регионалдыг бюджеттен хандырар. Тускай шериг операциязының хоочуннары болгаш киржикчилери күрүне деткимчези-биле профессионал эде белеткелди азы немелде профессионал өөредилгени халас ап болур.
2025 чылда Тывада тускай шериг операциязының киржикчилериниң ажы-төлүнге социал деткимче хемчеглериниң даңзызын калбартып, өөренип турар черинге изиг чемненилгени болгаш муниципалдыг транспортка аай-дедир чорааны дээш компенсацияны киирген. Камгалакчыларның ажы-төлү республиканың уруглар лагерьлеринге халас дыштанырлар. Регион деңнелинде өске-даа деткимче программалары база бар.
Ылаңгыя тускай шериг операциязының хоочуннары эмчи, реабилитация болгаш социал дузаны мурнады алырлар.
Тускай шериг операциязынга хамаарышкан айтырыгларга, ооң иштинде тускай шериг операциязының киржикчилеринге болгаш оларның өг-бүлелеринге социал деткимче хемчеглеринче бо чылын ниитизи-биле 1 млрд рубль бюджет акша-хөреңгизи аңгылаан.
Владислав Ховалыг регионнуң эрге-чагыргалары тускай шериг операциязының амгы болгаш халашкан дайынчыларын деткиир чаа аргаларны олар-биле кады сайгарып көөрүн дыңнаткан.
Президент Владимир Путинниң удуртканы Күрүне чөвүлелиниң октябрьда болур калбак хуралынга тускай шериг операциязының киржикчилерин болгаш оларның өг-бүлелерин деткиир талазы-биле чаа саналдарны киирер.
