Тыва бижиктиң төрүттүнген хүнүнде "Дамырак" бөлүүнүң ийи неделя үргүлчүлелдиг кичээлдери доозулганын Тываның гуманитарлыг болгаш социал-экономиктиг тускай шинчилелдер институду дыңнаткан.
Ол үе дургузунда бичии дамыракчылар тыва улустуң чараш езу-чаңчылдарын катаптап, дөргүл-төрел терминнерин сактып, тыва чоннуң чеди чүзүн малын өөренип база тыва оюннарның беш ажыг хевири-биле таныжып алыр аргалыг болганнар.
Оон аңгыда, "салгал ыяжын" чуруп тургаш, тыва дыл кырында дөргүл-төрел терминнерин шиңгээткеннер. Кижи бүрүзү бодунуң өг-бүлезиниң сонуургалының аайы-биле, бажыңының сүлде демдээн-даа чурааннар.
База бир сонуурганчыг чүүл дизе, дамыракчылар "Лео биле Тиг" деп мультфильмни тыва дылче очулдуруп, тырттырып турар студияның аалчылары болур аас-кежиктиг болганнар.
Түңнел кичээл тыва бижиктиң тывылган төөгүзүнге тураскааттынып, байырымныг доозулган.
