ТР-ниң Чазак Даргазының оралакчызы Уран-оол Ондарның удуртулгазы-биле республиканың конкурс комиссиязы «Агромотиватор» база «Агростартап» грант программаларынга киржир кордакчылар шилилгезиниң ийиги чадазын эрттирген.
Бо чылдан эгелеп көдээ ажыл-агый адырында сайгарлыкчы чорукту деткиириниң бо хевирлеринге көрдүнген акша-хөреңгиниң чамдыызын тускай шериг операциязының киржикчилеринге бээри көрдүнген. Комиссия кежигүннери 49 кордакчының төлевилелдерин сайгарган.
Ийиги чадаже эрте берген 49 кордакчының 46-зы «Агростартап» грантызын алыр конкурска киришкен болза, үш кижи – «Агромотиватор» грантыже төлевилелдерин киирген.
Киржикчилерниң 13-ү – тускай шериг операциязының хоочуннары.
Кордакчылар боттарының төлевилелдерин таныштырып, комиссияның айтырыгларынга харыылаан. Төлевилелдерниң хөй кезии көдээ ажыл-агый техниказын садып алырынче, бода мал азырап-өстүреринче, ол ышкаш сад ажылын эгелээринче угланган.
«Ада-чурт камгалакчылары» күрүне фондузунуң регионалдыг салбырының социал координаторлары мөөрей киржикчилеринге чугула документилерни чыырынга дузалажып, арат-тараачын ажыл-агыйын чорударының эге билиглеринге тускай курстарны эрттирген.
Тускай шериг операциязының киржикчилерин база оларның өг-бүле кежигүннерин деткиир хемчеглер санынче бо чылдың эгезинде Россияның Президентизи Владимир Путинниң эгелээшкини-биле «Агромотиватор» грантыны кииргенин сагындыраал. Эът болгаш сүт продукциязын бүдүреринге бода малды өстүрүп-азыраарынче көрдүнген грантының хемчээли чеди сая рубль, а өске угланыышкыннарже беш сая рубль чеде бээр.
Мөөрейниң негелдези-биле алырга, төлевилелди боттандырар өртек-үнениң 90 хире хуузун грант акшалары-биле дуглаар болза, арткан 10 хуузун грант алыкчызы боду киириштирер.
Көдээ ажыл-агый яамызы 2019 чылдан бээр «Агростартап» грантызы-биле агроүлетпүр комплекизиниң тус чер бараан бүдүрүкчүлерин деткип турар. Бо чылын агроүлетпүр адырынга бизнес ажыдар күзелдиг тускай шериг операциязының хоочуннарын деткиири-биле программаның акшаландырыышкынында аңгы хууну тускайлаан.
«Агромотиватор» биле «Агростартап» грант алыкчыларының даңзызын Көдээ ажыл-агый яамызының сайтызынга база социал четкилерге парлаар.
