2025 чылдан Тывада аныяк эртемденнерниң эртем ажылдарынга саң-хөө деткимчезиниң эң улуг хемчээли ийи катап көвүдээр – төлевилел бүрүзүнге ол 100-тен 200 муң рубль чеде бээр. Тываның чазаа регионалдыг бюджеттен субсидия алыр эрге дээш мөөрей шилилгезинге тиилээн эгелээшкиннерлиг аныяк эртем ажылдакчыларынга Тываның Баштыңының грантыларын бээриниң дүрүмнерин өскертир дугайында ТР-ниң Өөредилге яамызының саналын бадылаан.
Амыдыралдың бүгү-ле адырларынче кылымал угаан технологияларын киирери болгаш эртем-шенелде төптерин идепкейлиг хөгжүдери көрдүнген РФ-тиң эртем-технологтуг хөгжүлде эчис сорулгазын 2024 чылда бадылааны-биле холбаштыр, аныяк эртемденнерни деткиир дүрүмнерни чаартыры эргежок чугула апарганын яамы дыңнаткан.
Ылаңгыя күрүне деткимчезинче кордакчыларның төлевилелдеринге мөөрей шилилдезин чорударының, шинчилел киржикчилериниң субсидияларны ажыглаанының дугайында отчедун дужаарының, мөөрей организаторларының талазындан эртем шинчилелдериниң түңнелдеринге мониторингини кылырының чурумун элээн тода айыткан.
Грантылар хемчээлинге хамаарыштыр элээн эдилгелер кылдынган. Грант деткимчезиниң программазы эге чылдарындан эгелеп-ле аныяк эртемденнерниң ортузунда бодунуң дээштиин болгаш нептереңгейин бадыткаан. 2021-2023 чылдарда аныяк эртемденнерниң 32 эртем төлевилели Тываның Баштыңының ниитизи-биле ийи сая ажыг түңнүг шаңналдарын алган.
Программаның киржикчи бүрүзү боттарының шинчилелдери дээш ортумаа-биле 70 хире муң рубльди алган. Элээн улуг эртем шинчилелдерин чорударынга ол акшалар чедишпес болганы түңнелдерни үндүрүп турда билдинген. Ынчангаш Тываның Баштыңы Владислав Ховалыг, Россияның эртем хүнүнүң бүдүүзүнде, 2025 чылдан эгелеп грант түңүн 200 муң рубль чедир көвүдедир дугайында шиитпирни үндүрген.
Эртем грантыларның чылда фондузу бир сая рубльден эвээш болбас ужурлуг. Мөөрейниң тиилекчилерин Россия Федерациязының эртем-технологтуг хөгжүлде эчис сорулгазында мурнады хөгжүдер кылдыр айыткан беш адырга тодарадыр. Ол дээрге физика-техниктиг эртемнер, бойдус эртемнери (химия, минералогия, география), гуманитарлыг болгаш ниитилел эртемнери (төөгү, филология, педагогика, психология, экономика, философия, юриспруденция, социология, политология, культурология), ол ышкаш медицина болгаш фармацевтика, көдээ ажыл-агый болгаш ветеринария эртемнери-дир.
ТР-ниң Өөредилге яамызы аныяк эртемденнерге грантылар бээр мөөрейни бо чоокку үеде чарлаарын дыңнаткан.
